Մարտի 29-ի երեկոյան ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից արձակված գնդակից մահացու հրազենային վիրավորում ստացած 20-ամյա Հովսեփ Սամսոնի Անդրեասյանը Արարատի մարզի Մխչյան գյուղից է: NEWS.am-ի այս տեղեկությունը մեզ հետ զրույցում հաստատեց նաեւ Մխչյանի գյուղապետ Խաչիկ Պողոսյանը:
Հովսեփն արդեն մոտ 2 տարվա զինծառայող էր, առաջիկա ամիսներին պետք է զորացրվեր: Գյուղապետն ասաց, որ երիտասարդը նորմալ ծառայել է, երբեւէ չի լսել, որ ինչ-որ խնդիր ունենա, վերջերս էլ կարճատեւ արձակուրդով եկել էր: Խաչիկ Պողոսյանը նշեց նաեւ, որ երիտասարդը ունի երկու քույր եւ մեկ եղբայր, ինքը տան կրտսերն էր: Հայրը պարբերաբար մեկնում է արտագնա աշխատանքի, այժմ Հայաստանում է, մայրը տնային տնտեսուհի է, միջին սոցիալական պայմաններում ապրող ընտանիք են: Հովսեփ Անդրեասյանը վնասվածք էր ստացել որովայնի շրջանում, նրան տեղափոխել էին հոսպիտալ, որպեսզի վիրահատեն, սակայն մահացել էր:
Ավելի վաղ հայտնել էինք, որ մարտի 29-ի երեկոյան ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից արձակված գնդակից մահացու հրազենային վիրավորում է ստացել զինծառայող, 1995թ. ծնված Հովսեփ Սամսոնի Անդրեասյանը: ԼՂՀ պաշտպանության նախարարությունը կիսում է կորստյան ծանր վիշտը և իր զորակացությունը հայտնում զոհված զինծառայողի ընտանիքի անդամներին, հարազատներին և ծառայակիցներին:
