«Հիմնադիր խորհրդարանի» ` ապրիլի 24-ին կազմակերպած խաղաղ ցույցին, կարծում եմ, որ այնքան բազմություն չի հավաքվի, որը կկարողանա իշխանափոխություն իրականացնել: Այս մասին, այսօր` մարտի 30-ին, լրագրողներին ասաց ԱԱԾ պետի նախկին տեղակալ Գուրգեն Եղիազարյանը:
«Ապրիլի 24-ի «Հիմնադիր խորհրդարանի» նախաձեռնած ցույցն անիմաստ եմ համարում, սա իմ անձնական կարծիքն է: Ես կնախընտրեի, որ ցույցը ոչ թե 24-ին, այլ 25-ին, կամ 26-ին անեին, կարծում եմ, որ այդ օրը չարժեր անել: Բայց, ասեմ, որ եթե որոշ սրիկաներ որոշեն «Հիմնադիր խորհրդարանի» անդամներին նորից դանակահարել, ես անպայման կգնամ այդ ցույցին մասնակցելու: Եթե նրանց վրա կրկին ուժ կիրառեն, ապա ես կգնամ և կկանգնեմ Ժիրայր Սեֆիլյանի կողքին»,-ասաց Եղիազարյանը:
Գուրգեն Եղիազարյանը դատապարտեց «Հիմնադիր խորհրդարանի» հանդեպ իշխանությունների կիրառած բռնության դեպքերը և անթույլատրելի համարեց պատերազմի հերոսների հետ նման վարվելակերպը:
«Ինչի՞ են անիմաստ դանակահարում մարդկանց, հարվածում ձվերով, համացանցում վախեցնում նրանց: Այն, ինչ այսօր իշխանությունն անում է ուրիշների նկատմամբ, վաղը բումերանգի նման կպնելու է իրենց գլխին: Պատերազմի հերոսներին ծեծում են երեխաների, կանանց աչքի առաջ: Ցավոք, այսօր Հայաստանում հանցագործն է որոշում, թե ով, որտեղից ուր գնա և ոնց շարժվի: Հանցագործությունների շղթան շարունակվում է և կենացները գնալով քաղցրանում են»,-նշեց Եղիազարյանը:
