Մեկ շաբաթ առաջ Ֆրանսիայում լույս է տեսել Հայոց ցեղասպանության զոհերի հիշատակին նվիրված «Լռության ճիչը» գիրքը: Այս մասին այսօր՝ մարտի 30-ին, լրագրողների հետ հանդիպմանն ասաց գիքի հեղինակ, ֆրանսիական Le Monde-թերթի հայազգի լուսանկարիչ Անտուան Ագուջյանը: Գրքում զետեղված են նկարչի մոտ երեսուն տարվա աշխատանքները, որոնք ներկայացնում են հայերի ապրելակերպը ցեղասպանությունից առաջ եւ հետո:
«Ես գնացել եմ այն վայրերը, որտեղ հայերն ապրել են ցեղասպանությունից առաջ եւ հետո: Նկարներից մեկում Լիբանանում գտնվող որբանոցն է, որը պատմում է ցեղասպանությունից հետո որբ մնացած երախաների մասին»- պատմեց գրքի հեղինակ Անտուան Ագուջյանը:
Գրքի հեղինակը պատմեց, որ գրքի նախապատրաստական աշխատանքները տեւել են մեկ տարի, իսկ վերնագիրը կապված է լուսանկարչական արվեստի հետ, որը չունի ձայն եւ շարժում:
