Այսօր փոխըմբռնման քառակողմ հուշագիր է ստորագրվել ՀՀ կրթության եւ գիտության նախարարության, ՎիվաՍել-ՄՏՍ, «Սինոփսիս Արմենիա» եւ «Յունիքոմփ» ընկերությունների միջեւ: NEWS.am-ը ԿԳՆ-ից տեղեկացավ, որ փոխըմբռնման հուշագիրն ազդարարում է պետության եւ տեղեկատվական ու հեռահաղորդակցական տեխնոլոգիաների (ՏՀՏ) ոլորտի խոշոր ընկերությունների միջեւ ռազմավարական համագործակցության մասին՝ ՏՀՏ կրթությունը Հայաստանում որակապես նոր մակարդակի հասցնելու նպատակով: Ողջունելով միջոցառման մասնակիցներին` ՀՀ կրթության եւ գիտության նախարար Արմեն Աշոտյանը նշել է, որ այս նախագծով մեկնարկում է հերթական նորարարական կրթական գաղափարը: «Այս նախագիծը տարբերվում է. այն բովանդակային է, որտեղ մեր գործընկերների հետ միասին մշակել ենք կրթական նոր բովանդակություն, ծրագիր, որի հավակնություններն աննախադեպ են: Այսօր համաշխարհային կրթական տիրույթում վերջին զարգացումները տանում են նրան, որ տեխնոլոգիական կրթությունը ոչ միայն տեղեկատվական միջոցներից օգտվելու, այլ մտածելակերպ ձեւավորելու խնդիր է դնում: Եվ այս տեսակետից շատ հավակնոտ է դառնում եռամյա այս կրթական ծրագիրը. այն իր մեջ ներառում է ուսուսմնական նոր բովանդակություն եւ արդեն մշակված ծրագիր»,-նշել է նախարարը` ընդգծելով, որ մինչեւ սեպտեմբերի մեկը կվերապատրաստվեն համապատասխան ուսուցիչները, կիրականացվեն բոլոր նախապատրաստական աշխատանքները: «Մենք պարտավորվել ենք անել հնարավորը, որպեսզի առարկան դառնա դասավանդվող առարկա: Փաստացի, սա մեկ առարկա չէ, այլ առարկայաշղթա` իր համապատասխան երեք մոդուլային բովանդակությամբ»,-նշել է նախարարը:
Նշենք, որ փոխըմբռնման հուշագրի համաձայն՝ ՀՀ կրթության եւ գիտության նախարարությունն ապահովելու է «Միկրոէլեկտրոնիկա», «Հեռահաղորդակցության հիմունքներ», «Տեղեկատվական տեխնոլոգիաներ» մասնագիտական առարկաների ներդրումը, ինչպես նաեւ՝ մշակելու եւ հաստատելու է նշված մասնագիտական առարկաների առարկայական չափորոշիչները եւ ծրագրերը: Նոր ուսումնական պիլոտային ծրագիրը ՏՀՏ կրթության ոլորտում կներդրվի 2015-2016 ուսումնական տարվանից: Փոխըմռնման հուշագրով նախատեսված է կրթական ծրագրի իրականացում թվով 5 ուսումնական հաստատություններում՝ Գյումրու «Ֆոտոն« վարժարանում, «Քվանտ» վարժարանում, Վանաձորի մաթեմատիկայի եւ բնագիտական առարկաների խորացված ուսուցմամբ հատուկ դպրոցում, Հայաստանի պետական ճարտարագիտական համալսարանի Երեւանի ավագ դպրոցում եւ Ա. Շահինյանի անվան ֆիզիկամաթեմատիկական դպրոցում: Ծրագրով նաեւ նախատեսված է «Միկրոէլեկտրոնիկա», «Հեռահաղորդակցության հիմունքներ», «Տեղեկատվական տեխնոլոգիաներ» առարկաների լաբորատորիաների ստեղծում:
