Արցախի ՊԲ-ն հերքել է ադրբեջանական քարոզչամեքենայի հերթական ապատեղեկատվությունները։
«Այսօր ադրբեջանական որոշ լրատվամիջոցների, մասնավորապես haqqin.az կայքի կողմից տարածված տեղեկատվությունը, թե իբր Լեռնային Ղարաբաղում ուժեղ բախումներ են եղել, որոնց հետեւանքով հայկական կողմից հինգ զինծառայող է զոհվել, իրականությանը չի համապատասխանում եւ հակառակորդի պրոպագանդայի վառ երեւակայության հերթական արգասիքն է:
ՊԲ առաջապահ ստորաբաժանումները առաջնագծում շարունակում են տիրապետել իրադրությանը եւ վստահորեն իրականացնում են իրենց առջեւ դրված մարտական խնդիրները:
Ինչ վերաբերում է հակառակորդի կողմն անցած Անդրանիկ Գրիգորյանի մասին պատմող հաղորդագրությանը, որում նա գոհունակություն է հայտնում Ադրբեջանում իր գտնվելու պայմանների վերաբերյալ, ապա դրանով ադրբեջանցի վայ քարոզիչները հերթական անգամ թոզ են փչում միջազգային հանրության աչքերին՝ փորձելով իրենց սուլթանությունը ներկայացնել որպես ժողովրդավարական երկիր, որտեղ հարգվում են բոլորի, այդ թվում՝ ռազմագերիների ու պատանդների հիմնարար իրավունքներն ու ազատությունները:
Այնինչ իրականությունը այնտեղ բոլորովին այլ է, ինչի ամենախոսուն եւ թարմ օրինակը հենց ադրբեջանական կողմն անցած հայ զինծառայողի պարտադրանքի տակ արված նկարահանումներն են եւ դրանց հրապարակումը, ինչը նմանատիպ դեպքերի համար նախատեսված միջազգային մարդասիրական իրավունքի նորմերի կոպիտ խախտում է»,- ասվում է ԼՂՀ ՊՆ մամուլի ծառայության հաղորդագրության մեջ։