Հայոց ցեղասպանության 100-րդ տարելիցի միջոցառումների շրջանակում կիպրա-հայկական նամականիշ է թողարկվելու: Այս մասին գրում է «Cyprus Mail»-ը:
Կիպրոսի Ներկայացուցիչ պալատում հայ համայնքի ներկայացուցիչ Վարդգես Մահտեսյանը նամականիշի շնորհանդեսը երկու երկրներում միաժամանակ է կազմակերպելու: Կիպրոսում նախանշված միջոցառմանը մասնակցելու է նաեւ Հայաստանի Ազգային ժողովի նախագահ Գալուստ Սահակյանը:
Նամականիշի վրա պատկերվելու է Նիկոսիայի հայտնի, բայց արդեն փակված հայկական «Մելքոնյան» վարժարանը: Այն նախապես ապաստան է եղել Հայոց ցեղասպանությունից հրաշքով փրկված եւ Կիպրոս փախած որբերի համար:
100-րդ տարելիցի առիթով Կիպրոսում նաեւ այլ միջոցառումներ են անցկացվելու: Մահտեսյանի խոսքով, նպատակն է՝ հիշատակել 1915 թվականի Ցեղասպանության ժամանակ սպանված 1.5 մլն հայերին, ինչպես նաեւ Թուրքիայի կողմից Հայոց ցեղասպանության ճանաչման կոչ անել:
«Միաժամանակ սա ուղերձ է մարդկությանը՝ ապագայում նման ողբերգությունները կանխելու համար»,- նշել է նա:
Նախատեսվող միջոցառումներից են ցուցահանդեսները, ներկայացումները, դասախոսությունները, փաստագրական ֆիլմերն ու այլ ձեռնարկներ: Նաեւ հունարեն եւ անգլերեն գիրք է հրատարակվելու, որում ներառվելու են 1914-1923 թվականներին տեղական թերթերում Հայոց ցեղասպանության մասին հրապարակումները: