Կանադական հանրահայտ «Ottawa Magazine»ամսագրի ապրիլյան համարում տպագրվել է հարցազրույց հայտնի գերմանացի տնտեսագետ, Գերմանիայում գործող տնտեսական հետազոտությունների ինստիտուտի նախագահ Հանս Սինի հետ: Ստեֆըն Դեյլին տված հարցազրույցում Սինն անդրադառնում է Հայոց ցեղասպանության հետեւանքներին եւ աշխարհում աճող բարբարոսությանը խաղաղ միջոցներով առերեսվելու հնարավորություններին: Նա նշում է, որ երիտթուրքերը եւ Աթաթուրքը ապօրինի տիրացան հայերի ու քրդերի հայրենիքին` նախապես ծրագրելով եւ իրականացնելով վերջիններիս տեղահանությունն ու ջարդերը: Ու մինչ Աթաթուրքին հաջողվեց փրկել Օսմանյան կայսրությունը, որի իրավահաջորդն է ներկայիս Թուրքիան, դրա գինը վճարեցին հայերն ու քրդերը:
Սինն իր խոսքում շեշտում է, որ Ցեղասպանությունը ողջ մարդկության խնդիրն է եւ ոչ թե անպայմանորեն միայն թուրքերինն ու հայերինը:
Սինը շեշտում է, որ եթե իշխանությունների մակարդակով չի ստացվում գլուխ հանել խնդրից,գերադասելի են ճշմարտության եւ հաշտեցման տեղական մարմինները: Թուրքերից եւ հայերից բացի, այլ ժողովուրդների ներկայացուցիչները եւս կարող են մասնակից լինել, քանզի Ցեղասպանությունը վերաբերում է բոլոր ժողովուրդներին: Եվ իրականացված աշխատանքը «տաբու» ոլորտում (Թուրքիայում հանցագործություն է Հայոց ցեղասպանության մասին խոսելը) կնպաստի, որպեսզի այս հիմնախնդիրները դառնան հանրային ուշադրության առարկա:
