Աշխատանքային այցով Սյունիքի մարզում գտնվող ՏԿԱԻ նախարար Արմեն Երիցյանը մարզպետ Սուրիկ Խաչատրյանի հետ Մեղրի քաղաքում անցկացրած խորհրդակցության ժամանակ քննարկել է 5 մլն խմ ծավալով ջրամբարի կառուցման հարցը:
Խորհրդակցությանը ներկա են եղել Մեղրիի քաղաքապետ Արշավիր Հովհաննիսյանը, Ագարակի քաղաքապետ Մխիթար Զաքարյանը, Մեղրիի զինկոմիսարի, ոստիկանության եւ ռուսական սահմանապահ զորքերի ներկայացուցիչները:
Խորհրդակցության ընթացքում քննարկվել են նաեւ համայնքին աղբատար մեքենայի տրամադրման, մշակույթի տան, մանկապարտեզի եւ զբոսայգու տարածքից արտեզիան ջրի հեռացման խնդիրները: Քննարկվեց նաեւ տարածաշրջանում անտառային հրդեհները մարելու նպատակով տեղի հրշեջ-փրկարարական ծառայությանը մեծ տարողությամբ հրշեջ մեքենայի տրամադրման հարցը: Խորհրդակցության աշխատանքային խումբն անդրադարձավ նաեւ նոր տրանսֆորմատորային կայանի կառուցման խնդրին:
Ագարակ քաղաքի առկա խնդիրների քննարկման ընթացքում մասնավորապես խոսվեց համայնքի համար մարզադահլիճի կառուցման մասին:
ՏԿԱԻ նախարարը քաղաքապետերին հանձնարարեց հնչեցված խնդիրների լուծման վերաբերյալ ներկայացնել կոնկրետ ծրագիր եւ հաշվարկներ:
Նշենք, որ նախարար Երիցյանն այցելել է նաեւ Համայնքների խոշորացման պիլոտային ծրագրի մասը կազմող Սյունիքի 5 համայնքները (Տաթեւ, Սվարանց, Տանձատափ, Քաշունի, Հալիձոր), հանդիպել տեղի բնակիչների հետ եւ քննարկել համայնքների խոշորացման ծրագիրը: Պատասխանելով գյուղացիներին հուզող հարցերին՝ նախարար Երիցյանը մասնավորապես նշել է, որ համայնքների խոշորացման ծրագիրը որեւէ փաստաթղթային բարդություն չի առաջացնելու գյուղացիների համար: «Յուրաքանչյուր գյուղ ունենալու է իր ղեկավարը, որը լիազորված կլինի տեղեկանքներ տրամադրել տեղի բնակչին եւ գյուղացին ստիպված չի լինի անհրաժեշտ փաստաթղթի համար երկար ճանապարհ կտրել»,-ասել է Ա. Երիցյանը:
Նշենք, որ Սյունիքի մարզում աշխատանքային այցի 2-րդ օրը ՏԿԱԻ նախարարը մասնակցելու է Սյունիքում մարզային ճգնաժամային կառավարման կենտրոնի բացմանը եւ մարզխորհրդի նիստին:
