Այսօր Երեւանի ավագանու «Բարեւ Երեւան» խմբակցության անդամ Անահիտ Բախշյանը Երեւանի քաղաքապետ Տարոն Մարգարյանին դիմել է հարցումով, որով հետաքրքրվել է, թե ինչպե՞ս են դպրոցներն ապահովում իրենց գործունեությունը հրապարակային դարձնելու մասին օրենքի պահանջը:
Հարցման մեջ մասնավորապես, նշվում է.
«Հանրակրթության մասին» ՀՀ օրենքի 34-րդ հոդվածի պահանջով տարեկան մեկ անգամ, մինչեւ նոր ուսումնական տարվա սկիզբը, դպրոցները պետք է իրականացնեն ներքին գնահատում, որը ուսումնական հաստատության կողմից իր գործունեության վերլուծությունն է: Սույն գնահատմանը մասնակից պետք է դառնան նաեւ ծնողներն ու աշակերտները: Այն մինչեւ ընթացիկ տարվա սեպտեմբերի 5-ը պետք է ներկայացվի ուսումնական հաստատության կառավարման, մանկավարժական, ծնողական եւ աշակերտական խորհուրդներին: Դպրոցը պետք է ապահովի դրա հրապարակումը:
Օրենքի սույն պահանջը բխում է ուսումնական հաստատության ժողովրդավար կառավարման սկզբունքից, որն ամրագրված է 5-րդ՝ «Հանրակրթության նպատակները եւ պետական քաղաքականության սկզբունքները» հոդվածի 2-րդ կետի 3-րդ ենթակետում:
Կարծում եմ, որ Yerevan.am կայքում դպրոցի հասցեից, հեռախոսահամարից ու ֆինանսական փաստաթղթերից բացի պետք է դրվի յուրաքանչյուր դպրոցի կայքէջը, որտեղից շահագրգիռ հասարակությունը կստանա դպրոցի առօրյայի մասին տեղեկություններ, ինչպես նաեւ այնտեղ կտեղադրվի օրենքի պահանջով իրականացված դպրոցի ներքին գնահատման հաշվետվությունը եւ նրա գործունեությունը թափանցիկ կլինի հասարակությանը:
Խնդրում եմ տեղեկացնել, թե օրենքի վերոնշյալ պահանջը՝ հրապարակել դպրոցի ներքին գնահատման հաշվետվությունը, ինչպե՞ս է իրականացվում, ո՞րտեղ գտնել դրանք:
Այս հարցումն ուղղված է պետական այն բոլոր մարմիններին, որոնց ենթակայության տակ կան հանրակրթական ուսումնական հաստատություններ»: