Առաջին ատյանի դատարանի որոշմամբ 5 տարվա ազատազրկման դատապարտված, դերասան Վարդան Պետրոսյանի փաստաբաններն այսօր՝ ապրիլի 1-ին, ՀՀ Վերաքննիչ դատարանում միջնորդեցին հետաձգել դատական նիստը, որպեսզի ֆրանսաբնակ փաստաբաններ Մարի Lոռ Դոզեն եւ Ժիրայր Չոլակյանը կարողանան ստանալ առաջին ատյանի դատարանի վճռի թարգմանված տարբերակը եւ դիրքորոշում հայտնել դրա վերաբերյալ։ (ֆոտոռեպորտաժ)
«Ֆրանսիացի փաստաբանները չեն ստացել դատարանի որոշման թարգմանված տարբերակը, այդ պատճառով նրանք չեն կարող դիրքորոշում հայտնել Վերաքննիչ բերված բողոքի վերաբերյալ: Խնդրում եմ երկու շաբաթով հետաձգել դատական նիստը, որպեսզի փաստաբանները ստանան դատական ակտը եւ բողոքարկեն կամ չբողոքարկեն առաջին ատյանի որոշումը»,-ասաց փաստաբան Նիկոլայ Բաղդասարյանը։
Տուժող կողմի փաստաբան Ռուբեն Բալոյանը առաջարկեց դատական նիստը մեկ ամսով հետաձգել, որպեսզի դատավարական կողմերից որեւէ մեկի իրավունքը չխախտվի, եւ բոլորը կարողանան պատշաճ ծանոթանալ առաջին ատյանի դատարանի որոշմանը, նաեւ իրենց ներկայացրած վերաքննիչ բողոքին, որը նույնպես մեծ ծավալ ունի։
Տուժող կողմը եւ դատախազ Արթուր Սարգսյանը չառարկեցին ներկայացված միջնորդությանը:
Դատարանը բավարարեց միջնորդությունը եւ դատական նիստը հետաձգեց 20 օրով: Հաջորդ դատական նիստը նշանակվեց ապրիլի 21-ին:
Հիշեցնենք, որ 2013 թվականի հոկտեմբերի 20-ին, ժամը 21:20-ին Եղվարդ-Երեւան մայրուղու 32-րդ կմ-ում երկու ավտոմեքենա իրար են բախվել: Պատահարի հետեւանքով 7 մարդ մարմնական վնասվածքներով տեղափոխվել է հիվանդանոց, այդ թվում՝ դերասան Վարդան Պետրոսյանը: Ավելի ուշ Էդգար եւ Էդուարդ Հակոբյան եղբայրները մահացել են:
Փաստի առիթով հարուցվել էր քրեական գործ՝ ՀՀ Քրեական օրենսգրքի 242 հոդվածի 3-րդ մասով: Վարդան Պետրոսյանը ձերբակալվել էր: Դատաքննությունը սկսվեց 2014 թվականի մարտի 12-ին: Հայաստանի Կոտայքի մարզի ընդհանուր իրավասության դատարանը 2015թ. հունվարի 29-ին մեղավոր ճանաչեց Վարդան Պետրոսյանին՝ նրան դատապարտելով 5 տարի ժամկետով ազատազրկման:
Դատախազը եւ տուժող կողմը բողոքարկել են առաջին ատյանի որոշումը:
Լուսանկարները՝ Արսեն Սարգսյանի/NEWS.am