Human Rights Watch միջազգային իրավապաշտպան կազմակերպությունը հայտարարություն է տարածել Ադրբեջանի իշխանությունների գործողությունների կապակցությամբ, որոնք արգելել էին կազմակերպության ներկայացուցչին մուտք գործել երկիր։
Ինչպես գրում է contact.az-ը, Ադրբեջանի իշխանությունները մարտի 31-ին Բաքվի օդանավակայանում առանց որեւէ բացատրության ձերբակալել էին Human Rights Watch-ի ներկայացուցիչ Գեորգի Գոգիային, որը ժամանել էր Ադրբեջան՝ տեղի իրավապաշտպաններ Ռասուլ Ջաֆարովի եւ Ինթիղամ Ալիեւի դատական լսումներին ներկա գտնվելու համար։
Կազմակերպության տարածած հայտարարության մեջ ասված է, որ Գոգիան ձերբակալվել էր օդանավակայանում մարտի 31-ին, որից հետո նրան վերադարձրել էին անձնագիրը եւ առանց որեւէ բացատրության հետ էին ուղարկել Վրաստան։
«Գոգիայի մուտք արգելքը վկայում է, թե որքան հեռու է գնացել Ադրբեջանը մարդու իրավունքների ոտնահարումների հարցում»,- ասել է Եվրոպայի եւ Կենտրոնական Ասիայի հարցերով HRW տնօրեն Հյու Վիլյամսոնը։
«Նրանք արդեն այնքան բան են արել, որ վախենում են մեկը տեսնի դա։ Սա առաջին դեպքն էր, որ HRW- ներկայացուցչին արգելում են մուտք գործել որեւէ երկիր»,- հավելել է նա։
Բաքվում Եվրոպական խաղերի նախաշեմին խստացրել են քննադատների դեմ ճնշումները ինչպես երկրի ներսում, այնպես էլ միջազգային կազմակերպությունների շարքերում։
«Եվրոպական խաղերն ընդունելու եւ հյուրերի ազատություններն ու անվտանգությունը երաշխավորելու հայտարարությունների ֆոնին պաշտոնական Բաքուն երկրից վտարում է միջազգային իրավապաշտպան կազմակերպության ներկայացուցչին»,- ասված է HRW-ի զեկույցում։