Կոնյակը վերամշակվող արդյունաբերության այն եզակի արտադրանքներից է, որի մեծ մասն արտահանվում է: Այսպես, 2013 թվականին արտադրված կոնյակից արտահանվել է 90.2%-ը, անցյալ տարի՝ 96.6%-ը:
Նկատենք, որ արտահանման այս աճն ամենեւին էլ դրական միտումների վկայություն չէ: Հակառակը, ինչպես արտադրության, այնպես էլ արտահանման մեջ անկում է գրանցվել: Պարզապես արտահանման անկումը (0.2 մլն լիտրով) ավելի քիչ է եղել, քան ընդհանուր ոլորտում գրանցված անկումը (գրեթե 1.6 մլն լիտր):
Հայկական կոնյակի արտահանման աշխարհագրությունը բավական մեծ է: Սակայն գլխավոր ներկրողը Ռուսաստանն է, որի մասնաբաժինը կոնյակի արտահանման ընդհանուր ծավալում կազմում է շուրջ 80%: Այդ պատճառով մեր հյուսիսային հարեւանի տնտեսական ճգնաժամն ազդել է նաեւ Հայաստանում կոնյակի արտադրության վրա:
Ընթացթիկ տարվա հունվար-փետրվարին Հայաստանում կոնյակի արտադրությունը կրճատվել է 705.7 հազար լիտրով կամ 31.3%-ով: Եթե Ռուսաստանում կոնյակի սպառման խնդիրը պահպանվի եւ արտաքին այլ շուկաներ կգտնվեն, իրավիճակն ավելի կվատթարանա:
Հիշեցնենք, որ ավանդաբար կոնյակն արտահանման ծավալով առաջատար է այլ ապրանքների շարքում եւ վարկանիշում երկրորդ տեղն է զբաղեցնում: Այնպես որ՝ կոնյակի արտահանման լուրջ անկումն ավելի կխորացնի արտաքին առեւտրում անհավասարակշռությունը:
Բացի այդ, կոնյակի իրացման խնդիրը բացասաբար կանդրադառնա ֆերմերներից խաղողի գնման վրա: Նշենք, որ խաղողը համեմատաբար բարձր ապրանքայնություն ունի, եւ բերքի գերակշռող մասը մեծածախ գնվում է ձեռնարկությունների կողմից:
Մինչեւ խաղողի բերքահավաքն ընդամենը մի քանի ամիս է մնացել, եւ այդ ընթացքում պետությունը պետք է լուծի այդ խնդիրները: Հակառակ դեպքում, ֆերմերները ծանր վնասներ կկրեն: