Նախորդ տարի նվազել են թե Հայաստանում արձանագրված հանցագործությունների, թե դրանց բացահայտման դեպքերը: NEWS.am-ին տվյալներ են հայտնի դարձել Դատախազության 2014թ գործունեության հաշվետվությունից, որը օրերս ուղարկվել է ԱԺ նախագահին:
Այսպես, 2014թ. ընթացքում գրանցվել է հանցագործության 17,546 դեպք, 2013թ այդ թիվը կազմում էր 18,333, այսինքն՝ դեպքերը նվազել են 4.3%-ով: Բացահայտումը կազմել է 79.9%, 2013թ. դա 82.6% էր, այսինքն` բացահայտումը նվազել է 2.7%-ով:
Արձանագրվել է հրազենի գործադրմամբ կատարված հանցագործության 68 (2013թ.` 66) դեպք, որոնցից բացահայտվել է 57-ը (2013թ.` 49)։ 2014թ. ընթացքում աճել են` մարդու դեմ ուղղված հանցագործությունների դեպքերը՝ 200-ով (2013թ.` 4,727 – 2014թ.` 4,927) կամ 4.2%-ով, սեփականության դեմ ուղղված հանցագործությունների դեպքերը՝ 190-ով (2013թ.` 6,475 – 2014թ.` 6,665) կամ 2.9%-ով, այլ հանցագործությունների դեպքերը՝ 7-ով (2013թ.` 47 – 2014թ.` 54) կամ 14.9%-ով:
Նույն ժամանակահատվածում նվազել են հասարակական անվտանգության, հասարակական կարգի, բնակչության առողջության դեմ ուղղված հանցագործությունների դեպքերը` 303-ով, տնտեսական գործունեության դեմ ուղղված հանցագործությունների դեպքերը՝ 257-ով, պետական իշխանության, պետական ծառայության և կառավարման կարգի դեմ ուղղված հանցագործությունների դեպքերը՝ 624-ով: