Մարտի 31-ին Ստամբուլի դատախազ Սելիմ Քիրազին պատանդ վերցրած ահաբեկիչները հեռախոսով կապվել են Թուրքիայի սահմաններից դուրս գտնվող անձնաց հետ։
Այս մասին հայտարարել է թուրք վարչապետ Ահմեդ Դավութօղլուն Ստամբուլում Քիրազի հուղարկավորությունից հետո։
«Միջադեպի ժամանակ ահաբեկիչները մի քանի միջազգային զանգ են կատարել։ Նրանք կապ են հաստատել արտասահմանում ապրող անձնաց հետ։ Մենք այդ ամենին հետեւում ենք երեկվանից եւ անվտանգության ուժերին ցուցումներ ենք տվել ահաբեկչության մասնակիցների նկատմամբ ձեռնարկել բոլոր անհրաժեշտ միջոցները, որտեղ էլ որ նրանք գտնվեն»,- հայտարարել է վարչապետը, ով խոստացել է պատժել դատախազի մահվան մեջ մեղավորներին, փոխանցում է ՏԱՍՍ-ը։
Հիշեցնենք, որ մարտի 31-ին 2 ահաբեկիչ 9 ժամ շարունակ Քիրազին պատանդ էին պահել Ստամբուլի Արդարադատության պալատի նրա անձնական գրասենյակում։ Ահաբեկիչները պատկանում էին Հեղափոխական ժողովրդական փրկության կուսակցության ճակատ ծայրահեղ աջ կազմակերպությանը, որի գործունեությունը Թուրքիայում արգելված է։