Ադրբեջանական որոշ լրատվամիջոցներ համառորեն շարունակում են իրականության հետ որեւէ առնչություն չունեցող ապատեղեկատվության տարածումը: Այդ մասին ասվում է Հայաստանի ՊՆ հայտարարության մեջ։
«Ավելին` իրականությանը չհամապատասխանող կեղծիքները երբեմն վերածվում են զավեշտի` հայկական եւ ադրբեջանական զինված ուժերի շփման գոտում արձանագրված դեպքերի եւ պատահարների ստույգ տվյալները թաքցնելու եւ փաստերը խեղաթյուրելու Բաքվի քարոզչամեքենայի գործելաոճը վերագրվում է հայկական կողմին:
Առավել քան զավեշտալի է, որ Հայաստանին, Լեռնային Ղարաբաղին եւ շփման գոտում տիրող իրավիճակին վերաբերող ինչպես սեփական, այնպես էլ միջազգային հանրությանը մատուցվող քարոզչական խայծերը, ամբողջովին կեղծ եւ ակնհայտ ապատեղեկատվությունը տարածվում են նաեւ հայրենական որոշ լրատվամիջոցներով եւ սոցցանցերի օգտատերերի միջոցով:
Նման լուրեր տարածողներին խորհուրդ ենք տալիս տեղի չտալ ադրբեջանական աղբյուրներով տարածվող հերյուրանքին եւ զերծ մնալ չճշտված, բացահայտ կեղծ տեղեկություններ հրապարակելուց:
ՀՀ պաշտպանության նախարարությունը որդեգրել է բաց, թափանցիկ եւ օբյեկտիվ տեղեկատվական քաղաքականություն` հասարակությանը հաշվետու լինելով հայկական զինված ուժերի բոլոր ձեռքբերումների ու առավել եւս` բացթողումների համար:
ՀՀ պաշտպանության նախարարությունը եւս մեկ անգամ հայտարարում է, որ շփման գոտում լարվածության աճը Ադրբեջանի ռազմաքաղաքական եւ ռազմական ղեկավարության արկածախնդիր, ռազմական տեսանկյունից չհիմնավորված եւ վրեժխնդրությամբ տրամաբանված նենգ քաղաքականության արդյունքն է, որը հանգեցնում է իրենց իսկ ուժերի շրջանում մարդկային զգալի կորուստների:
Հայկական կողմը խստորեն հետեւում է հրադադարի ռեժիմի պահպանմանը եւ իրավիճակին համարժեք գործողությունների է դիմում միայն հակառակորդի կողմից արձանագրվող նպատակային խախտումների դեպքում»,- ասվում է հայտարարության մեջ: