Լեռնային Ղարաբաղի կարգավիճակի վերաբերյալ որեւէ քվեարկություն կարող է լինել միայն երկարատեւ գործընթացից հետո: Այժմ հարկավոր է պայմանավորվել այն հարցերի շուրջ, թե ինչպես կարող է տեղի ունենալ այդ գործընթացը, որպեսզի բոլոր կողմերին երաշխիքներ տրվեն: Այս մասին հայտարարել է Հարավային կովկասում ԵՄ ներկայացուցիչ Փիթեր Սեմնեբին: Նա հիշեցրել է, որ կարգավորման սկզբունքներն արդեն իսկ հնչեցվել են ԵԱՀԿ Մինսկի խմբի (Ռուսաստան, Ֆրանսիա, ԱՄՆ) կողմից: «Ես կարծում եմ, որ առկա է կարգավորման համար անհրաժեշտ հրաշալի բազա, Եվրամիությունը կողմերին կոչ է անում հետամուտ լինել այդ սկզբունքներին»,-ընդգծել է Սեմնեբին: Նրա խոսքով, ԼՂ խնդրի կարգավորման գործընթացի վրա ազդում է Հայաստանի եւ Թուրքիայի միջեւ հարաբերությունների նորմալացումը: «Այդ երկու գործընթացների միջեւ ֆորմալ կապ առկա չէ: Սակայն միեւնույն ժամանակ չպետք է ժխտել, որ ինչ էլ որ տեղի ունենա այդ գործընթացներից մեկի հետ, այն ազդելու է վստահության մթնոլորտի վրա: Այս հանգամանքի վրա պետք է ուշադրություն դարձնել»,-ասել է Սեմնեբին:
