Երեւան քաղաքի պատմության թանգարանի ցուցասրահում բացվել է Հայոց ցեղասպանության 100-ամյա տարելիցին նվիրված «Հայաստանը՝ օտարերկրյա նկարիչների աչքերով» ցուցահանդեսը: 6 երկրների 20 նկարիչների աշխատանքները ստեղծվել են «Հայկական ներկապնակ» բացօթյա նկարչության փառատոնի ժամանակ: Ծրագիրն իրականացվել է Երեւանի քաղաքապետարանի աջակցությամբ, «Փյունիկ» հիմնադրամի եւ «Լոռվա ձոր» հայրենակցական միության նախաձեռությամբ:
Բացման հանդիսավոր արարողությանը ներկա են գտնվել ու աշխատանքներին ծանոթացել Երեւանի քաղաքապետի տեղակալներ Արամ Սուքիասյանը եւ Դավիթ Օհանյանը:
Քաղաքապետ Տարոն Մարգարյանի անունից ողջունելով ներկաներին եւ շնորհավորելով ցուցահանդեսի բացման առիթով՝ Արամ Սուքիասյանը նկատել է, որ չնայած աշխատանքներն օտարազգիների աչքերով են ու վրձնով, սակայն գործերը հենց հայկական գույներով են:
«Կտավներն իսկապես շատ հետաքրքիր են: Ուզում եմ իմ ոգեւորությունը փոխանցել եւ ընդգծել, որ ցուցահանդեսը նոր լիցք կհաղորդի մայրաքաղաքի մշակութային կյանքին: Մենք սիրով շարունակելու ենք մեր աջակցությունը ցուցաբերել նմանօրինակ նախաձեռնություններին»,-նշել է քաղաքապետի տեղակալ Արամ Սուքիասյանը:
«Լոռվա ձոր» հայրենակցական միության նախագահ Սերգո Երիցյանն իր հերթին շնորհակալություն է հայտնել քաղաքապետարանին մշտական աջակցության համար:
Ռուս, ուկրաինացի, բելառուս, ղազախ, վրացի, լեհ եւ լիտվացի նկարիչները կտավների միջոցով ներկայացրել են իրենց տեսած հայկական բնաշխարհը, պատմաճարտարապետական հուշարձաններն ու մարդկանց:
Առանձին թեմայով ներկայացվել է նաեւ մայրաքաղաքը: Փառատոնի ավարտին բոլոր նկարիչների կողմից ստեղծված «Քաղաքամայր Երեւանի գույներ» հավաքական ստեղծագործությունը, որն ի դեպ 2x3 մետր կտավի վրա է պատկերված, որպես նվեր հանձնվել է Երեւանի քաղաքապետարանին:
Ցուցահանդեսի մուտքն ազատ է եւ կգործի տասը օր:
