Այնթափում տղամարդու՝ կնոջը եւ աներոջը դանակահարելու դեպքը եղել է անձնական խնդիրների պատճառով: Այս NEWS.am-ի թղթակցի հետ զրույցում ասաց Այնթափի գյուղապետ Կարեն Սարգսյանը:
Նա նշեց, որ ամուսինները մոտ 5 տարի է՝ ամուսնացած են, ունեն որդի: Փեսան ավելի շատ խնդիրներ ուներ զոքանչի հետ, քանի որ համարում էր, թե խառնվում է իրենց կյանքին: Այդ անձնական, ընտանեկան խնդիրների հողի վրա էլ եղել է միջադեպը: «Ինչ-որ բաժանության խնդիր կա, այդ տղան սիրում է իր կնոջը, չի ուզում բաժանվի»,-ասաց գյուղապետը:
Նա նշեց, որ վնասվածքները թեթեւ են եղել, կինը եւ նրա հայրը հիվանդանոցում չեն: Տղամարդը տարբեր աշխատանքներ էր կատարում՝ տաքսի էր վարում, գյուղատնտեսական աշխատանքներով էր զբաղվում, իսկ կինը ուսուցչուհի էր:
Ավելի վաղ հայտնել էինք, որ Արարատի մարզի Այնթափ գյուղի փողոցներից մեկում ապրիլի 10-ին թեժ ծեծկռտուք է տեղի ունեցել բնակիչների միջեւ, որն ավարտվել է դանակահարությամբ:
NEWS.am-ին հայտնի է դարձել, որ 30-ամյա մի տղամարդ վիճաբանել է նախկին կնոջ հոր հետ, որի ընթացքում իր ձեռքի դանակով հարվածներ է հասցրել նախկին կնոջն ու վերջինիս հորը: Նա, սակայն, դանակահարությամբ չի բավարարվել, այդքանից հետո սկսել է ձեռքերով ու ոտքերով հարվածներ հասցրել նրանց` սպառնալով սպանել:
Տուժողներին տեղափոխել են հիվանդանոց: Իսկ դանակահարողին դեռ չեն հայտնաբերել: