Արտաշատ քաղաքի Արարատի եւ Վայոց Ձորի մարզերի ընդհանուր իրավասության դատարանում այսօր` ապրիլի 13-ին, ամուսնու կողմից դանակի 21 հարվածից մահացած Դիանա Նահապետյանի սպանության գործով դատական նիստին դատարան հրավիրված դատական հոգեբան Էլդա Գրինը հայտարարեց, որ կնոջ սպանության պահին մեղադրյալ Վոլոդյա Մուրադյանը եղել է կումուլյատիվ աֆեկտի՝ ժամանակի ընթացքում կուտակված բացասական հույզերի պոռթկման վիճակում:
«Ուսումնասիրելով քրեական գործի նյութերը և համադրելով փորձաքննվողի պատմածը, պնդում եմ, որ Վոլոդյա Մուրադյանը սպանության պահին եղել է աֆեկտի մեջ, որը կարող է տևել շատ կարճ և երկար, քանի որ հետաֆեկտային տևողության կոնկրետ ժամանակ չկա: Փորձարարական հետազոտություն եմ արել և ոչ մի ագրեսիվություն չի նկատվել մեղադրյալի մոտ, միայն` ուժասպառություն, հոգնածություն, քնկոտություն»,-ասաց Էլդա Գրինը:
Փորձագետ-հոգեբանի խոսքով` երբ մարդ կումուլյատիվ աֆեկտի մեջ է գտնվում` նրա մոտ գիտակցության նեղացում է լինում և տարբեր առարկաներով բազմաքանակ հարվածներ է հասցնում դիմացինին. «Վոլոդյա Մուրադյանը հենց այդ վիճակում է գտնվել` ամբաստանյալի կինը երկար ժամանակ նրան նվաստացրել է վատ վարքի պատճառով, այդ պատճառով էլ հուզական լարվածության կուտակում է եղել և վերջին կաթիլի պոռթկում»:
Տուժողի ներկայացուցիչ փաստաբան Նարինե Մկրտչյանը NEWS.am-ի հետ զրույցում նշեց, որ համաձայն չէ դատական հոգեբան Էլդա Գրինի կատարած փորձաքննության արդյունքի հետ, քանի որ վստահ է, որ մարդասպանը աֆեկտի տակ չի եղել եւ դատական հոգեբանի կատարած փորձաքննությունը չէր կարող հանգեցնել այդ եզրակացությանը:
«Դատական հոգեբանը այդ եզրահանգմանն է եկել միայն քրեական նյութի ուսումնասիրության և ամբաստանյալի հետ զրույցի արդյունքում և դրանով չի կարող հաստատել, որ Վոլոդյա Մուրադյանը եղել է կումուլյատիվ աֆեկտի տակ»,-ասաց նա:
Գործով մեղադրող դատախազ Հայկազ Նիկողոսյանը դատարանից ժամանակ խնդրեց` համալիր հանձնաժողովային փորձաքննություն անցկացնելու եւ միջնորդություն ներկայացնելու համար: Դատարանը միջնորդությունը բավարարեց` նրան տալով 4-5 աշխատանքային օր:
Դատական հաջորդ նիստը տեղի կունենա ապրիլի 18-ին:
Նշենք, որ Դիանայի ամուսինը` 51-ամյա Վոլոդյա Մուրադյանը, մեղադրվում է 2012թ. դեկտեմբերին առանձնակի դաժանությամբ կնոջը սպանելու համար։ Ըստ մեղադրական եզրակացության՝ սկզբում ծաղկամանով հարված է հասցրել կնոջ գլխին, այնուհետեւ ոտքով հարվածել ծնոտին եւ մարմնի այլ մասերին, իսկ վերջում քարշ է տվել խոհանոց եւ դանակի 21 հարված հասցրել Դիանային՝ 14-ամյա եւ 17-ամյա դուստրերի աչքի առջեւ:
Հիշեցնենք, որ Դիանայի գործի լուսաբանմամբ և դեպքի ընթացքի հետևողականությամբ զբաղվում է «Հասարակություն առանց բռնության» ՀԿ-ի Արագ Արձագանքման Խումբը 2012 թ.-ի դեկտեմբերից և «Ընդդեմ կանանց նկատմամբ բռնության» կոալիցիան: