Հռոմի Պապը Սուրբ Պետրոսի տաճարում պատմական պատարագ մատուցեց, որի ընթացքում նշանավորեց հայերի նահատակության 100-րդ տարելիցը: Այս մասին գրել է արգենտինական «La Nación»-ը՝ մեկնաբանելով ապրիլի 12-ին Վատիկանում Հայոց ցեղասպանության զոհերի հիշատակին մատուցված պատարագը:
«Չնայած Թուրքիայի կողմից ճնշմանը, Պապը համարձակ կերպով օգտագործեց «ցեղասպանություն» եզրույթը»,- գրել է պարբերականը՝ հավելելով, որ Թուրքիան մշտապես ժխտում է Հայոց ցեղասպանությունը, որը ճանաչվել է 22 երկրների կողմից, այդ թվում՝ Արգենտինայի, եւ որի մեկնարկը համարվում է 2015 թվականի ապրիլի 24-ը:
«La Nación»-ը նշել է, որ Սուրբ Պետրոսի տաճարում պատարագին ներկա են եղել նաեւ Հայաստանի նախագահ Սերժ Սարգսյանը, Ամենայն Հայոց կաթողիկոս Գարեգին 2-րդը, Մեծի Տանն Կիլիկիո կաթողիկոս Արամ 1-ինը, հայ կաթոլիկների Պատրիարք Ներսես Պետրոս 19-րդը, ինչպես նաեւ հայկական պատվիրություններ ամբողջ աշխարհից, այդ թվում՝ մեծաթիվ պատվիրակություն Արգենտինայից: «Բոլորը Հայոց ցեղասպանության 100-րդ տարելիցի խորհրդանշանով կրծքանշաններով եւ շարֆերով էին»,- գրել է պարբերականը:
Հոդվածում նաեւ հիշատակվում է, որ Ֆրանցիսկոսը Բուենոս Այրեսի արքեպիսկոպոս եղած ժամանակ Արգենտինայի հայ համայնքի մեծ բարեկամն է եղել եւ Հայոց ցեղասպանության մասին երեք անգամ հիշատակել է իր «Երկնքի եւ երկրի մասին» գրքում:
