Հայոց ցեղասպանության զոհերի հիշատակին Հռոմի Ֆրանցիսկոս I Պապի մատուցած պատարագից եւ Անկարայի դեմարշից հետո Իտալիայի իշխանությունները լռում են: Առայժմ արտահայտվել է միայն Իտալիայի կառավարության աշխատակազմի քարտուղարի տեղակալ Սանդրո Գոցին: Այս մասին գրում է իտալական Il fatto Quotidiano պարբերականը: Նրա հայտարարության իմաստը հետեւյալն է. որքան քիչ բարկացնես Թուրքիային, այնքան ավելի մեծ հաջողությամբ կարող ես աշխատել նրա հետ:
«Վստահ եմ՝ հարկ չկա, որ նման հարցերում կառավարությունը պաշտոնական դիրքորոշում արտահայտի: Ինձ համար, չնայած դա իմ անձնական դիրքորոշումն է, դա (Հայոց ցեղասպանությունը - խմբ.) եղել է: Սակայն կառավարությունը չպետք է օգտագործի «ցեղասպանություն» բառը: Անկարայի հետ մենք երկխոսություն ենք ծավալում ժողովրդավարության, մարդու իրավունքների եւ ազգային փոքրամասնությունների հարցերի շուրջ: Կարծում ենք՝ երկխոսությունն ու բանակցությունները պետք է լուծեն այդ հարցերը, այլ ոչ թե բարիկադները»,- հայտարարել է Գոցին:
Ըստ նրա, երբ Թուրքիայի հետ Իտալիայի հարաբերություններն ավելի լավ էին, հաջողվեց լուծել քրդական փոքրամասնության, ինչպես նաեւ Ստամբուլում քրիստոնյա ազգային փոքրամասնությունների խնդիրները: Իհարկե, նա չի հստակեցրել, թե հատկապես ինչպես է հաջողվել դա անել, եթե քուրդ ապստամբների հետ մարտերը շարունակվում են, իսկ հայերի եւ հույների գույքային խնդիրները Ստամբուլում հեռու են լուծում ստանալուց:
«Հռոմի Պապի խոսքերը չափազանց բարկացրել են Անկարային: Այստեղ պատմությունն ընթերցելու կարեւոր եւ ծանոթ հարցն է առաջանում: Դրա բացարձակ մեկնաբանություն գոյություն չունի: Մեզ՝ քաղաքական գործիչներիս համար, ավելի լավ է դիտարկել այժմյան խնդիրները»,- հավելել է նա:
Այս հայտարարությունը քննադատել են ոչ միայն ընդդիմության, այլեւ իշխող կոալիցիայի անդամները: «Նման անվիճելի նյութի մասին պարզ արտահայտվելու համար համարձակություն է անհրաժեշտ: Իսկ կառավարությունը պետք է հեռու մնա Հռոմի Պապի դեմ թուրքական կառավարության մեղադրանքներից: Ամեն ինչից զատ՝ հենց դրանից է սկսվում ներկայում հետապնդվող քրիստոնյաների պաշտպանությունը»,- հայտարարել է Area Popolare քրիստոնեա-դեմոկրատական պատգամավորական խմբի անդամ Ալեսանդրո Պագանոն:
Չնայած Իտալիան որոշել է լռել, Եվրամիությունն ընդգծել է, որ Հայաստանի եւ Թուրքիայի հարաբերությունների կարգավորումը շատ կարեւոր է, այդ պատճառով մեծ ուշադրություն է հատկացվում Թուրքիայի եվրաինտեգրման հարցում առաջընթացի մասին հաշվետվություններում: Ըստ Il Fatto Quotidiano-ի, այս մասին հայտարարել է ԵՄ արտաքին քաղաքականության հանձնակատար Ֆեդերիկա Մոգերինիի մամուլի քարտուղար Մայա Կորիյանչիչը: «Շատ կարեւոր է, որպեսզի Հայաստանի եւ Թուրքիայի հարաբերությունները հնարավորինս շուտ կարգավորվեն, իսկ դիվանագիտական հարաբերությունների մասին արձանագրությունները՝ իրականացվեն»,- հավելել է նա: