Վաղը` հուլիսի 28-ին, ժամը 13-14-ը Թեղուտի պաշտպանության խումբը բողոքի ակցիա կանցկացնի ՎՏԲ բանկի դիմաց (հասցե` Նալբանդյան 46, մետրոյի «Հանրապետության Հրապարակ» կայարանի հարեւանությամբ):
Բանն այն է, որ ռուսական ՎՏԲ բանկը պատրաստվում է այս տարի ACP ընկերությանը տրամադրել խոստացված շուրջ 300 մլն. դոլարի վարկը՝ Թեղուտում պղնձամոլիբդենային հանքավայրի շահագործման նպատակով, այնինչ Թեղուտի պաշտպանության խումբը դեմ է Թեղուտի հանքավայրի շահագործմանը, քանի որ այն լուրջ վնաս է հասցնում էկոլոգիային:
«Հիշեցնենք, որ մինչեւ օրս վարկի մի փոքր մասն է միայն տրամադրվել, իսկ հիմնական գումարի տրամադրումն առ այսօր ձգձգվում է ֆինանսական ճգնաժամի եւ մեր խմբի գործադրած ջանքերի շնորհիվ: Չնայած Թեղուտի հանքարդյունաբերական ծրագրի օրինականությունը վիճարկվում է ՀՀ դատական ատյաններում եւ ՄԱԿ-ի Եվրոպական Տնտեսական Հանձնաժողովի Օրհուսի կոնվենցիայի համապատասխանության կոմիտեում` ՎՏԲ-ն պատրաստակամություն է հայտնել ACP-ին հատկացնել նաեւ վարկի մնացած մասը, եթե հանքարդյունաբերական նախագիծը համապատասխանեցվի բանկի մշակած բնապահպանական չափորոշիչներին»,- նշում են Թեղուտի պաշտպանության խմբի անդամներն ու պահանջում ՎՏԲ-ից.
- կասեցնել Թեղուտի հակաէկոլոգիական եւ անօրինական ծրագրի ֆինանսավորումը,
- հանրայնացնել իր բնապահպանական չափորոշիչները եւ դրանք մշակողների անունները,
- վերջ տալ հասարակության նկատմամբ արհամարհական վերաբերմունքին, հարգել եւ ի կատար ածել հաշվետվության եւ թափանցիկության սկզբունքները: Պահանջում ենք հստակ պատասխան էկոլոգիական եւ իրավապաշտպան կազմակերպությունների նամակներին։
Խումբը շարունակելու է իր անզիջում պայքարը: Մեր համբերության բաժակն արդեն լցվել է եւ հաջորդ քայլը քաղաքացիական անհնազանդությունն է»,- ասված է նրանց հաղորդագրության մեջ:
