Մոսկվայի քաղաքային դատարանը անփոփոխ է թողել ռուսաստանցի ընդդիմադիր գործիչ Բորիս Նեմցովի սպանության գործով անցնող Համզաթ Բահաեւի կալանքի որոշումը, հաղորդում է «ՌԻԱ նովոստին»:
Դատարանը մերժել է Բահաեւի փաստաբանի բողոքը, ով միջնորդել էր ազատ արձակել իր պաշտպանյալին՝ առողջական վիճակի պատճառով:
«Ես առնչություն չունեմ այդ հանցագործությանը: Ինձ մեղադրում են մի բանում, որի հետ ես կապ չունեմ»,-հայտարարել է Բահաեւը դատարանում: Նա դատական նիստին մասնակցել է կալանավայրից՝ տեսակապի միջոցով:
Ավելի վաղ լրատվամիջոցները գրել էին, որ Բահաեւն ալիբի ունի: Նա մեղադրվում է նրանում, որ սպանությունը կատարողներին տրամադրել է իր բնակտարածքը, որպես թաքնվելու վայր:
