Եվրախորհրդարանն, այսօր՝ ապրիլի 15-ին, իր լիագումար նիստում, սկսել է Հայոց ցեղասպանության հարցով քննարկումները:
«Հայոց ցեղասպանության 100-րդ տարելիցի» թեմայով քննարկումները տեղի կունենան լիագումար նիստի երկրորդ մասում: Եվրոպացի խորհրդարանականները քննարկումից հետո կքվեարկեն բանաձեւը:
Հայ դատի Եվրոպայի գրասենյակի ներկայացուցիչ Պետո Դեմիրճյանը NEWS.am-ի թղթակցի հետ զրույցում նշել է, որ բանաձեւը Եվրախորհրդարանի օրակարգ է մտել Հայ դատի եւ Ֆրանսիայի ազատական պատգամավոր Ժան Մարի Կավադայի նախաձեռնությամբ:
Հիշեցնենք, որ մարտի 12-ին Եվրոպական խորհրդարանն ընդունել է մարդու իրավունքների ու ժողովրդավարության հարցով 2013-ի զեկույցը, որի որոշակի պարբերություններ վերաբերում են Հայաստանին:
Մասնավորապես, փաստաթղթում կա հատված, որը «Հայոց ցեղասպանության 100-րդ տարելիցի նախաշեմին կոչ է անում ԵՄ անդամ երկրներին ճանաչել Ցեղասպանությունն ու խրախուսում է ԵՄ կառույցներին՝ նպաստել այդ գործընթացին»: