Պատմությունը մեզ սովորեցրել է, որ լռելը բավարար չէ. մենք պետք է ավելին անենք։ Այս մասին ամերիկյան The Asbury Park պարբերականում հրապարակված հոդվածում գրում է ԱՄՆ Նյու Ջերսի նահանգից ընտրված Հանրապետական կոնգրեսական Քրիս Սմիթը՝ անդրադառնալով Թուրքիայի եւ միջազգային հանրության կողմից Հայոց ցեղասպանության միջազգային ճանաչման անհրաժեշտությանը։
«Ցեղասպանությունը ամենասարսափելի հանցագործությունն է, որը կարող է գործել մարդը, կամ որին կարող է ենթարկվել մարդը։ Այն երբեք չի կարելի մոռանալ։ Մոռանալով այն, նույնն է, թե բթացնել մեր խիղճը։ Առանց այն ճանաչելու հաշտեցման ցանկացած փորձ դատապարտված է»,- գրել է կոնգրեսականը։
Նրա խոսքով՝ Հայոց ցեղասպանությունը ժխտելու քաղաքական լայնածավալ արշավը այսօր նույնքան ցնցող է, որքան 1915թ. վայրագությունների մասին պատմությունները, եւ թուրքերի ժխտողական քաղաքականությունն է, որ հայերին թույլ չի տալիս բուժել անցյալի վերքերը։
Ընդգծելով, որ հենց հայերի ցեղասպանության շուրջ լռությունն է, որ հնարավոր է դարձրել հետագա բոլոր ցեղասպանությունները աշխարհում, կոնգրեսականը ԱՄՆ Կոնգրեսին եւ նախագահին կոչ է արել ասել ճշմարտությունը՝ իրենց համար ապահով ապագա երաշխավորելու համար։
Հոդվածում Քրիս Սմիթը նաեւ նշել է, որ Ցեղասպանության 100-ամյա տարելիցի նախօրեին՝ ապրիլի 23-ին, Կոնգրեսում Ցեղասպանության մասին լսումները նախագահելու է ինքը։