NEWS.am զգալի կրճատումներով ընթերցողի ուշադրությանն է ներկայացնում Ֆրանսիայում գործող Ռասիզմի, հակասեմականության եւ ժխտողականության դեմ պայքարի «Memorial 98» ասոցիացիայի հիմնադիր ԱԼբերտ Հերշկովիչի՝ «Le Huffington Post»-ում հրապարակված հոդվածը:
Հռոմի Պապի հայտարարությունից հետո թուրքական կառավարության բուռն արձագանքը ցույց է տալիս, որ այդ իշխանությունները հետեւում են պետական ժխտողականության ուղեգծին: Այն թուրքական քաղաքականությունում գերիշխում է 100 տարի առաջ՝ 1915 թվականի ապրիլին Հայոց ցեղասպանության մեկնարկի պահից: Այդ ցեղասպանությանը նախորդել են հայերի բազմաթիվ զանգվածային կոտորածները, այդ թվում՝ 19-րդ դարում, ժխտողականության նույն տեսությամբ, որը դատապարտում էր Ժան Ժորեսը:
100-րդ տարելիցի մոտենալուց զուգահեռ, Էրդողանը՝ ավտորիտար ռեժիմի նախագահը, որը մշտապես նվազեցնում է քաղաքացիների ազատությունները, աջակցում եւ ուժեղացնում է Ցեղասպանության ճանաչման դեմ դիմակայությունը: Ավելին, նա սադրանքի է դիմում՝ ապրիլի 23-ին եւ 24-ին կազմակերպելով Գալիպոլիի ճակատամարտի 100-ամյակի միջոցառումները: Նա նույնիսկ վիրավորեց Հայաստանի նախագահին՝ նրան հրավիրելով մասնակցել այդ միջոցառումներին, որոնք կազմակերպվել են՝ Հայոց ցեղասպանության 100-րդ տարելիցի հիշատակի արարողություններից ուշադրությունը շեղելու նպատակով:
Էրդողանը հենվում է «աշխարհաքաղաքական» հաշվարկների վրա, որոնք շատ կառավարությունների մղում են պահպանել թուրքական ռեժիմը՝ այն օգտակար համարելով Մերձավոր Արեւելքում ընթացիկ բախումներում:
«Memorial 98»-ը հանդես է գալիս միջազգային մեծ արարողության օգտին, որը կայանալու է ապրիլի 24-ին, Ստամբուլում, որտեղ սկսվել է Ցեղասպանությունը: Արարողությանը մասնակցելու են մարդու իրավունքների պաշտպանության թուրքական շարժման անդամները:
