Ավստրալիայի Նոր Հարավային Ուելս նահանգում օրերս պղծել են ասորիների ցեղասպանությանը նվիրված հուշակոթողը: Այս մասին տեղեկանում ենք Ավստրալիայի Հայ դատի հանձնախմբի կայքից:
Նրանց փոխանցմամբ՝ այս վանդալիզմն ուղղված է ոչ միայն ասորիներին, այլեւ հրեաներին եւ հայերին, քանի որ այդ դեպքից առաջ հրեաներն իրենց հարգանքի տուրքն են մատուցել Հոլոքոստի զոհերի հիշատակին, իսկ օրեր անց էլ Հայոց ցեղասպանության 100-րդ տարելիցն է: Նշենք, որ հուշակոթողը պղծել են նաեւ նացիստական սվաստիկայով, որի կողքին կարմիր ներկով գրված է. «Fuck jews, fuck assyrians, fuck armenians»:
«Ավստրալիայի Հայ դատի գրասենյակը դատապարտում է նման ռասիստական հարձակումները այդպիսի բազմամշակութային նահանգում: Գրասենյակը կոչ է անում նահանգի իշխանություններին պարզել, թե ով եւ ինչու է նման քայլի դիմել»,-ասված է հաղորդագրության մեջ:
