Հալեպում տեղի ունեցող իրադարձությունների հետևում կանգնած է Թուրքիան: Այս մասին այսօր` ապրիլի 16-ին, լրագրողներին ասաց արաբագետ Սարգիս Գրիգորյանը` հավելելով, որ Թուրքիան այդպիսով փորձում է ապահովել իր ներկայությունը Սիրիայի հարակից տարածքներում:
«Հալեպը ռմբակոծում են այն խմբավորումները, որոնց զինյալները ռազմական պատրաստվածություն են անցնում Թուրքիայում: Թուրքիան այս խմբավորումների միջոցով փորձում է իր ներկայությունը ապահովել Սիրիայի հարակից տարածքներում: Այս խմբավորումներում մեծ թվով թուրքեր են ներգրավված, և դրանց լիդերներից շատերը Սիրիայի պատերազմից առաջ Թուրքիայում են գտնվել և ինստրուկտաժ անցել»,-ասաց արաբագետը:
Սարգիս Գրիգորյանի կարծիքով` այս խմբավորումները Հայոց ցեղասպանության 100-ամյա տարելիցին նվիրված միջոցառումների ժամանակ են ակտվանում, որի մասին վկայում են վերջին օրերին Հալեպում տեղի ունեցող հաճախակի ռմբակոծությունները.«Չեմ բացառում, որ Հռոմի պապի՝ Հայոց ցեղասպանության վերաբերյալ հայտարարությունից հետո Սիրիայի իսլամական խմբավորումները կսկսեն ակտիվ գործողություններ ոչ միայն հալեպահայերի, այլև այնտեղ գտնվող քրիստոնյաների ու կաթոլիկների դեմ»,- նշեց Գրիգորյանը: