Եվրոպական հակառասիստական շարժում կազմակերպությունը (EGAM) իր անհանգստությունն է հայտնել Թուրքիայի վարչապետի խորհրդական Էթյեն Մահչուփյանին Հայոց ցեղասպանության մասին արած հայտարարությունից հետո պաշտոնանկ անելու կապակցությամբ։
Կազմակերպության հայտարարության մեջ ասված է, որ 2014թ.-ից Մահչուփյանը եղել է Թուրքիայում բարձր պաշտոններ զբաղեցրած միակ հայը։ «Չնայած վարչակազմի «անսպասելի պաշտոնանկության» մասին պնդումներին՝ դա իհարկե պաշտոնից ազատում էր։ Իրական պատճառը պարզ է. Մահչուփյանը չի ընդունում պետության ժխտողական քաղաքականությունը»,- ասված է հայտարարության մեջ։
Ինչպես նշել է EGAM-ի ղեկավար Բենջամին Էբթանը, նրանց չեն վախեցնում Թուրքիայի սպառնալիքները, եւ նրանք ապրիլի 24-ին Ստամբուլում հարգելու են Ցեղասպանության զոհերի հիշատակը։ Առաջին անգամ թութսի էթնիկ խմբի ցեղասպանություն վերապրածները, Հայաստանից ժամանած երիտասարդ ակտիվիստները, հայկական սփյուռքի ներկայացուցիչներն ու 20 երկրների երիտասարդները կհավաքվեն Ստամբուլում։ Բացի այդ, մի խումբ երիտասարդներ ապրիլի 25-ին Թուրքիայից կժամանի Երեւան։
Նշենք, որ Էթյեն Մահչուփյանը Հռոմի Պապի ելույթից հետո հայտարարել է, թե անհնար է Աֆրիայում եւ Բոսնիայում տեղի ունեցածը ասել ցեղասպանություն, իսկ հայերի հետ տեղի ունեցածը չասել։ Նա պնդել էր, որ զարմանալին այն չէ, որ Հռոմի Պապը հիմա է ասում ցեղասպանություն, այլ զարմանալին այն է, որ ինչպես է այսքան տարի չասել։