Երեւանի Նոր-Նորք թաղամասում 2014թ. հուլիս 15-ին հարեւանների կողմից դաժան ծեծի ենթարկվելուց հետո մահացած, արցախյան ազատամարտի մասնակից 52-ամյա Վարդան Թումանյանի գործով տուժողի իրավահաջորդի ներկայացուցիչ, փաստաբան Հայկ Ալումյանը պատրաստվում է բողոք ներկայացնել դատախազին: Այս մասին NEWS.am-ին ասաց փաստաբանը:

«Մենք միջնորդել էինք, որ կրկնակի փորձաքննություն նշանակվի, քանի որ համաձայն չենք արդյունքների հետ, սակայն նախաքննական մարմինը մերժել է՝ պատճառաբանելով, որ խախտումներ տեղի չեն ունեցել: Քննիչի այս որոշումը մենք պատրաստվում ենք բողոքարկել դատախազին»,- ասաց Հայկ Ալումյանը:

Նշենք, որ ըստ փորձաքննության արդյունքների՝ Վարդան Թումանյանի ծեծը որեւէ կապ չունի նրա մահվան հետ: Արդյունքները ստացվելուն պես գործով կալանավորված «Ջունգլն» եւ Գագիկ Ղուկասյանն ազատ էին արձակվել. նրանց նկատմամվ խափանման միջոց էր ընտրվել ստորագրություն չհեռանալու մասին, իսկ մեղադրանքը մնացել էր նույնը՝ Քրեական օրենսգրքի 112-րդ հոդվածի 2-րդ մասին:

Ինչպես ավելի վաղ հաղորդել էր NEWS.am-ը, սպանված ազատամարտիկի հարազատների խոսքով՝ 2014թ. հուլիսի 13-ին հարեւանների՝ Վարդան Թումանյանի եւ Բաբկեն Սարգսյանի միջեւ վիճաբանություն էր առաջացել շախմատի խաղի ժամանակ, ավելի ուշ Բաբկեն Սարգսյանի հարազատները՝ Գեւորգ Սարգսյանն ու Գագիկ Ղուկասյան, եկել էին Վարդան Թումանյանի հետ «զրուցելու», տնից դուրս հրավիրել ու դաժան ծեծի ենթարկել դստեր եւ կնոջ ներկայությամբ։ Մի քանի օր անց Վարդան Թումանյանը հիվանդանոցում մահացել էր։ Վարդան Թումանյանի մահվան առնչությամբ հարուցվել էր քրեական գործ Քրեական օրենսգրքի 112-րդ հոդվածի 2-րդ մասի 6-րդ, 14-րդ կետերով, այն է՝ դիտավորությամբ առողջությանը ծանր վնաս պատճառելը, որը կատարվել է մի խումբ անձանց կամ կազմակերպված խմբի կողմից, եւ անզգուշությամբ առաջացրել տուժողի մահ: Գեւորգ Սարգսյանն ու Գագիկ Ղուկասյանը կալանավորվել էին։