Երեւանը շարունակելու է պայքարել Հայոց ցեղասպանության միջազգային ճանաչման եւ դատապարտման համար, քանի որ դա Հայաստանի ազգային անվտանգությանը վերաբերող հարց է։ Այս մասին հայտարարել է ՌԴ-ում Հայաստանի դեսպան Օլեգ Եսայանը։
Չորեքշաբթի Եվրախորհրդարանը բանաձեւ ընդունեց, որով կոչ է անում Թուրքիային ճանաչել Հայոց ցեղասպանությունը եւ նման կերպով աջակցել երկու ժողովուրդների միջեւ խաղաղության հաստատմանը։
«Քանի որ ներկայիս Թուրքիան, լինելով Օսմանյան կայսրության իրավահաջորդը, չի ընդունում այդ ցեղասպանությունը, նա անմիջական պատասխանատվություն է կրում։ Մենք շարունակելու ենք ջանքեր գործադրել դրա միջազգային ճանաչման համար, քանի որ դա ազգային անվտանգությանը վերաբերող հարց է։ Վերջին հաշվով, դառնալով ցեղասպանության զոհ, մենք պարտավորություն ստանձնեցինք ոչ միայն սեփական ազգի, այլ նաեւ հետագա սերունդների առաջ։ Մենք պետք է այս պայքարի դրոշակակիրը լինենք»,- Հայոց ցեղասպանության 100-ամյակին նվիրված կոնֆերանսի ժամանակ հայտարարել է դեսպանը, փոխանցում է «ՌԻԱ Նովոստի»-ն։
Մեկնաբանելով փաստը, որ աշխարհի ոչ բոլոր պետություններն են ճանաչում Ցեղասպանությունը, դիվանագետը նշել է, որ խնդիրը նրանում է, որ մինչեւ հիմա աշխարհում կա քաղաքական անտարբերություն եւ ինչն ավելի նկատելի է՝ քաղաքական նպատակահարմարություն։
«Իսկ դատապարտումը պետք է բոլորին՝ ե՛վ հայ, ե՛ւ թուրք ժողովրդին։ Մեր ազգերի միջեւ հարաբերությունների կարգավորումն անխուսափելի է, սակայն դրա համար կոնկրետ քայլեր են պետք»,- հավելեց դեսպանը։
Դեսպանը նշել է, որ հիշատակի միջոցառումները ուղղված չեն Թուրքիայի կամ թուրք ազգի դեմ։ «Ավելին՝ մենք ուրախ ենք, որ իրենց կողմից նույնպես հնչում են առողջ բանականության խոսքեր։ Մենք վստահ ենք, որ համընդհանուր դատապարտումն անխուսափելի է, եւ այն վրա կհասնի»,- ասել է Եսայանը։
