ՀՀ վերաքննիչ դատարանն այսօր՝ ապրիլի 17-ին, մերժեց բախտագուշակ Վարսիկի հարսին՝ 28-ամյա Հասմիկ Խաչատրյանին ընտանեկան բռնության ենթարկելու գործով տուժող եւ պաշտպանական կողմերի ներկայացրած բողոքները։
Սարգիս Հակոբյանի փաստաբան Տիգրան Աբրահամյանն իր ելույթում նշեց, որ Հասմիկը գործով հակասական ցուցմունքներ է տվել, դատարանն էլ հիմնվել է միայն նրա ցուցմունքի վրա՝ հաշվի չառնելով Սարգիս Հակոբյանի 6 հարազատների ցուցմունքները, որոնք հակառակն են պնդում:
«Նույնիսկ Աստվածաշնչում է ասվում, որ մեկ հոգու ցուցմունքի հիման վրա անձին չեն մեղադրում, ու դատարանը միայն Հասմիկ Խաչատրյանի ցուցմունքի հիման վրա մեղադրական դատական ակտ է կայացրել»,-ասաց նա:
Հասմիկ Խաչատրյանն էլ NEWS.am-ի հետ զրույցում նշեց, որ իր համար սպասելի էր դատարանի այս որոշումը:
«Ես գիտեի, որ արդարություն չկա, բայց մինչեւ վերջ պայքարելու եմ՝ արդարությանը հասնելու համար: 9 տարի ծեծեց, հետո էլ փողով ազատ արձակվեց»,-ասաց Հասմիկ Խաչատրյանը՝ նշելով, որ ինքը Վերաքննիչի որոշումը կբողոքարկի նաեւ Վճռաբեկում:
Նշենք, որ տուժողը եւ մեղադրողը պահանջում են Սարգիս Հակոբյանին դատապարտել ոչ թե 119 հոդվածի 1-ին մասով, այլ 119 հոդվածի 2-րդ մասի 3-րդ կետով, որը վերաբերում է նրանից կախվածության մեջ գտնվող անձի նկատմամբ խոշտանգումներին: Տուժող կողմը բողոք է ներկայացրել նաեւ համաներման ակտ կիրառելու եւ քաղաքացիական հայցը մասնակիորեն բավարարելու մասով, իսկ պաշտպանական կողմը` Սարգիս Հակոբյանին արդարացնելու պահանջով:
Նշենք, որ Սարգիս Հակոբյան այսօր դատարան չէր ներկայացել, նա այս պահին կալանավորված է մեկ այլ գործով։ Նրա դեմ ուրիշի գույքը վնասելու, խոշոր չափի վնաս հասցնելու մեղադրանք է առաջադրվել:
Հիշեցնենք, որ Գեղարքունիքի մարզի բնակիչ Սարգիս Հ.-ն մեղադրվում էր իր հետ ամուսնական հարաբերությունների մեջ գտնվող կնոջը խոշտանգելու մեջ: Գործի նյութերի համաձայն՝ Սարգիս Հ.-ն, գտնվելով ամուսնական հարաբերությունների մեջ Հասմիկ Խ.-ի հետ, խոշտանգել, պարբերաբար ծեծի է ենթարկել, մարմնական եւ հոգեկան տառապանք է պատճառել նրան: Քրեական գործ է հարուցվել 119 հոդվածի 2-րդ մասի 3-րդ կետով (խորշտանգելը անչափահասի կամ հանցավորից նյութական կամ այլ կախվածություն ունեցող անձի, ինչպես նաեւ առեւանգված կամ որպես պատանդ վերցված անձի նկատմամբ): Սարգիս Հակոբյանը մեղավոր էր ճանաչվել 119-րդ հոդվածի 1-ին մասով եւ համաներմամբ ազատ արձակվել: