«Բարգավաճ Հայաստան» կուսակցության մարզային այցելությունները հետաձգվել են, դրանք կլինեն ապրիլի 24-ից հետո: NEWS.am-ի թղթակցի հետ զրույցում ԲՀԿ առաջնորդ Նաիրա Զոհրաբյանն ասաց, որ այս ընթացքում ինքը կլինի Ստրասբուրգում՝ մասնակցելու ԵԽԽՎ նստաշրջանին, կուսակցությունը այստեղ կմասնակցի Ցեղասպանության 100-ամյա տարելիցի միջոցառումներին: Իր վերադարձից հետո կսկսեն մարզային շրջայցերը:
Ինչ վերաբերում է ԲՀԿ կանանց խորհրդի նախագահի ընտրությանը, Նաիրա Զոհրաբյանն ասաց, որ առաջիկա 2 շաբաթվա ընթացքում կգումարեն կանանց խորհրդի նիստ, կքննարկեն այդ հարցը եւ կընտրեն նախագահ:
Ավելի վաղ հայտնել էինք, որ ԲՀԿ կանանց խորհրդի նախագահ Ռոզա Ծառուկյանը դադարեցրել է կուսակցական պատկանելությունն եւ ԲՀԿ կանանց խորհրդի պատվավոր նախագահի պաշտոնում պաշտոնավարումը:
Նշենք, որ Մարզային այցելությունների շրջանակում նախատեսված են հանդիպումներ ԲՀԿ տարածքային կառույցների հետ, նպատակն է վերականգնել եւ ակտիվացնել ԲՀԿ տարածքային կառույցները: Գագիկ Ծառուկյանի ԲՀԿ-ից եւ ակտիվ քաղաքականությունից հեռանալուց հետո մի շարք տարածքային կառույցների ղեկավարներ հայտարարել են ԲՀԿ-ից դուրս գալու մասին: Տեղեկություններ էին տարածվում նաեւ, որ ԲՀԿ կառույցներում տասնյակ մարդիկ են դիմումներ գրում եւ հեռանում: