Նիդեռլանդները միայն խոսքով է ճանաչել Հայոց ցեղասպանությունը, այլ ոչ գործով: Այս մասին հոլանդական «De Volkskrant» պարբերականում հրապարակված «Կառավարություն, վերջապես ճանաչեք Հայոց ցեղասպանությունը» վերնագրով հոդվածում գրել է պատմաբան եւ գրող Անտոնի Հոլսլագը:
Նիդեռլանդները ճանաչել է հայերի, ասորիների, արամեացիների, հույների դեմ Թուրքիայի իրականացրած հանցագործությունը, սակայն Թագավորության քաղաքականության վրա դա ոչ մի կերպ չի ազդել: Ըստ Հոլսլագի, Թուրքիայի հետ հարաբերությունները, այդ թվում՝ առեւտրային, կառավարությանը խանգարում են խոսել 1915-19 թ.թ. Օսմանյան կայսրությունում տեղի ունեցածի մասին:
«Ցավալի է տեսնել դա: Ցավալի է մի երկրի համար, որտեղ տեղակայված է Հաագայի տրիբունալը, որը դատում է Ցեղասպանության ռազմական հանցագործներին: Հռոմի Պապը Թուրքիային կոչ արեց ճանաչել Հայոց ցեղասպանությունը: Իսկ քրիստոնեական ավանդույթներով հիմնադրված Ազատ համալսարանն ապրիլի 24-ին հրավիրել է Հայոց ցեղասպանությունը հերքող անձ, որը, հնարավոր է, նաեւ ելույթ ունենա բանավեճերում: Բանավեճեր՝ ճանաչման օրը… Դա սադրանք է՝ մեծատառով»,- իր հոդվածում գրել է պատմաբանը:
Նշենք, որ Անտոնի Հոլսլագի աշխատանքներից է նաեւ «Արարատի քարերի մեջ» գիրքը՝ նվիրված Հայոց ցեղասպանության պատմությանը: