Գերմանիայի արտգործնախարար Վալտեր Շթայնմայերը խուսափել է ցեղասպանություն բառն օգտագործել Օսմանյան կայսրության տարածքում տեղի ունեցած իրադարձությունները նկարագրելու համար, հայտնում է Deutche Welle-ն։
«Անցյալի վայրագությունները չեն կարող նշվել մեկ բառով կամ վերածվել այդ բառի շուրջ վիճաբանությունների»,- հայտարարել է Շթայնմայերը ապրիլի 17-ին Էստոնիա կատարած այցի ժամանակ։
Համաձայն ֆրանսիական AFP գործակալության՝ Գերմանիայի կառավարության մամուլի քարտուղար Շտեֆան Զայբերգը հայտարարել է, որ «ճակատագրական տեղահանումների եւ հալածանքների զոհերի» հիշատակումը պետք է մնա քննարկման կենտրոնում։ Նրա խոսքով՝ կատարվածին գնահատական պետք է տան պատմաբանները։
Նշենք, որ Գերմանիայի Կանաչների միությունն ու ձախերի կուսակցությունը կատարվածը բնութագրում են ցեղասպանություն բառով։ Քաղաքական գործիչների շրջանում կառավարության քննադատությունը ավելի բարձր է հնչում։ Այսպես՝ Գերմանիայի Քրիստոնյա դեմոկրատների միության ներկայացուցիչ Էրիկա Շթայնաբը հայտարարել էր, որ ժամանակն է պաշտոնապես ճանաչել Հայոց ցեղասպանությունը։