Այժմյան Թուրքիայի կառավարությունը մեծ պատասխանատվություն է կրում պատմական վերքերի համար: Այս մասին NEWS.am-ի թղթակցի հետ զրույցում հայտարարեց Եվրոպական ժողովրդական կուսակցությունից Եվրախորհրդարանի պատգամավոր Էսթեր դե Լանգեն՝ անդրադառնալով Հայոց ցեղասպանության շուրջ Եվրախորհրդարանի բանաձեւին եւ Թուրքիայի ժխտողական քաղաքականությանը:
«Կարծում ենք, որ ժողովրդավարության պայմաններում անհրաժեշտ է հաշտվել անցյալի հետ, առերեսվել դրա հետ: Օսմանյան կայսրությունը, ոչ թե այժմյան թուրքական պետությունն է պատասխանատու այն բանի համար, ինչ 100 տարի առաջ տեղի է ունեցել հայերի հետ, սակայն ներկայիս Թուրքիայի կառավարությունները պետք է գիտակցի, որ մեծ պատասխանատվություն է կրում պատմական վերքերը բուժելու հարցում»,- ընդգծեց Էսթեր դե Լանգեն:
Հիշեցնենք, որ ապրիլի 15-ին Բրյուսելում Եվրախորհրդարանը Հայոց ցեղասպանության մասին բանաձեւ ընդունեց, որում Թուրքիային կոչ է արվում 1915 թվականի դաժանությունները որպես ցեղասպանություն ճանաչել, առերեսվել սեփական անցյալի հետ եւ շարունակել ջանքեր գործադրել հայ եւ թուրք ժողովուրդների իրական հաշտեցման ուղղությամբ: