Գյումրիում անցած տարվա ամռանը սպանված Հարություն Գրիգորյանի ընտանիքի շահերը ներկայացնող փաստաբան Լիպարիտ Սիմոնյանը համաձայն չէ գործով կալանավորված, ապա ստորագրությամբ ազատ արձակված Արման Կատունյանին առաջադրված մեղադրանքի հետ: Այս մասին NEWS.am-ին ասաց փաստաբանը, որն ապրիլի 18-ին ծանոթացել է գործի քննության նյութերին եւ ստացել մեղադրական եզրակացությունը:

«Ըստ մեղադրական եզրակացության՝ Կատունյանը հոգեկան խիստ հուզմունքի պահին է կատարել սպանությունը: Մենք այս մեղադրանքի հետ համաձայն չենք: Մնացածի մասին կխոսենք արդեն դատավարության ընթացքում»,- ասաց Լիպարիտ Սիմոնյանը:

Նա հայտնեց, որ մեղադրական եզրակացությունն ուղարկվել է հաստատման, առաջիկա օրերին գործը կգնա Շիրակի մարզի ընդհանուր իրավասության դատարան:

Նշենք, որ մարտի վերջին ստացվել է փորձաքննության եզրակացությունը, որի համաձայն՝ ՊՆ Շիրակի մարզի Ռազմական ոստիկանության քրեական հետախուզության բաժնի պետ Արման Կատունյանը դեպքի պահին եղել է հոգեբանական աֆեկտի վիճակում: Եզրակացությունից հետո նրան  առաջադրված մեղադրանքը փոխվել է եւ մեղադրանք է առաջադրվել ՀՀ քրեական օրենսգրքի 105-րդ հոդվածով եւ 235-րդ հոդվածով: Հիշեցնենք, որ մինչ այդ մեղադրանք էր առաջադրվել ՀՀ ՔՕ 104 հոդվածի 1-ին եւ 235 հոդվածի 1-ին մասերով (ապօրինաբար, դիտավորությամբ մեկ ուրիշին կյանքից զրկելը եւ ապօրինի զենք կրելը):

Ավելի վաղ NEWS.am-ը հայտնել էր, որ Շիրակի մարզում 2014թ. hուլիսի 24-ին ժամը 16:00-ի սահմանում, Գետք համայնքի չօգտագործվող ֆերմաներից մեկի տարածքում գտել էին Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային տարբեր վնասվածքով։