Երեւանում Հայոց ցեղասպանության 100-րդ տարելիցի միջոցառումներին ներկա կլինեն 4 երկրների նախագահներ՝ Ֆրանսիայի, Ռուսաստանի, Կիպրոսի եւ Սերբիայի: Այս մասին, այսօր՝ ապրիլի 20-ին, լրագրողների հետ հանդիպման ժամանակ հայտարարել է ՀՀ նախագահի աշխատակազմի ղեկավար, Հայոց ցեղասպանության 100-րդ տարելիցի միջոցառումները կազմակերպող հանձնաժողովի նախագահ Վիգեն Սարգսյանը:
Նա հավելել է, որ Կիպրոսի նախագահը Հայաստան կայցելի երկրի խորհրդարանի նախագահի հետ: «Մնացած պատվիրակությունները ներկա կլինեն միջոցառումներին իրենց երկրների ներկայացուցիչների ու նախագահների մակարդակով: Շատ երկրների ղեկավարներ նշել են, որ սա ամբողջ մարդկության դեմ իրականացված հանցագործության 100-րդ տարելիցն է»,-ասել է Վիգեն Սարգսյանը:
Հայտնի է, որ Գերմանիայի նախագահն ապրիլի 23-ին մասնակցելու է հիշատակի միջոցառման Բեռլինում: «Սուրբ Աթոռը ներկայացված է լինելու կարդինալների, այսինքն նախարարական մակարդակով: Չեխիայի նախագահը նշել է, որ այդ օրը ինքը հանդիպում է ունենալու Վատիկանում, ուստի չի կարող մասնակցել Երեւանում կայանալիք միջոցառումներին»,-հավելել է ՀՀ նախագահի աշխատակազմի ղեկավարը:
