Ազատամարտիկ Խաչիկ Ավետիսյանը նստացույց-հացադուլ է սկսել «Հիմնադիր խորհրդարանի» կալանավորված անդամներին եւ մյուս քաղբանտարկյալներին ազատ արձակելու պահանջով։ Այսօր՝ ապրիլի 20-ին, նա մինչեւ ուշ երեկո կմնա Մարդու իրավունքների պաշտպանի գրասենյակի առջեւ։
«Մարդու իրավունքների պաշտպանի գրասենյակի մոտ եմ անում հացադուլը, որ նրանց հիշեցնեմ, որ Հայաստանում կան քաղբանտարկյալներ, այդ հարցով զբաղվեն: Քաղաքական պահանջ չենք ներկայացնում, միայն պահանջում ենք քաղբանտարկյալներին ազատ արձակել։ Հացադուլը տեւելու է այնքան, մինչեւ քաղբանտարկյալները ազատ արձակվեն: Ես «Հիմնադիր խորհրդարանի» ծրագրի հետ համաձայն չեմ, ես սա «Հիմնադիր խորհրդարանի» համար չեմ անում, ես սա անում եմ 17 քաղբանտարկյալների համար՝ Շանթ Հարությունյանը եւ իր խումբը, Վոլոդյա Ավետիսյանը, Ժիրայր Սեֆիլյանը»,- Ազատության հրապարակում լրագրողներին ասաց Խաչիկ Ավետիսյանը:
Թեեւ Խաչիկ Ավետիսյանը նախապես հայտարարել էր, որ իրեն միանալու են մի քանի տասնյակ ազատամարտիկներ, այնուամենայնիվ, նա այսօր մենակ է հացադուլ անում: Վաղվանից ազատամարտիկը հացադուլը կշարունակի տանը, իսկ ապրիլի 25-ին կվերադառնա ՄԻՊ գրասենյակի մոտ: Ազատամարտիկը հույս ունի, որ ապրիլի 25-ին իրեն կմիանան նաեւ մյուս ազատամարտիկները։
