ՀՀ գյուղատնտեսության նախարար Սերգո Կարապետյանն այսօր ընդունել է ԱՄՆ Միջազգային զարգացման գործակալության (USAID) պատվիրակությանը, որը գլխավորում էր ԱՄՆ ՄԶԳ հայաստանյան առաքելության ղեկավար Քարեն Հիլիարդը: Այս մասին NEWS.am-ը տեղեկացավ ՀՀ գյուղատնտեսության նախարարության տեղեկատվության եւ հասարակայնության հետ կապերի բաժնից:
Հանդիպման նպատակն էր քննարկել ԱՄՆ ՄԶԳ կողմից Հայաստանում իրականացվող ծրագրերի ընթացքը եւ նախարարության հետ համագործակցության հեռանկարները: Հանդիպման սկզբում տիկին Հիլիարդը տեղեկացրել է, որ գյուղատնտեսության բնագավառում իրականացվող երկկողմ ծրագրեր շարունակական բնույթ կունենան: Այդ թվում, նա մասնավորապես կարեւորել է մի շարք ծրագրեր, որոնց իրականացումը կնպաստի կոոպերատիվների ստեղծմանը, ձկնաբուծության ոլորտում օգտագործվող ջրի խնայողատար տեխնոլոգիաների կիրառմանը, ֆերմերների մարքետինգային կարողությունների ուժեղացմանը, ինչպես նաեւ գյուղատնտեսական բարձրակարգ կրթության ապահովմանը:
Այս ենթատեքստում տիկին Հիլիարդը տեղեկացրել է, որ առաջիկայում ամերիկյան կողմը նպատակադրված է ՀՀ գյուղատնտեսության նախարարության հետ նախաձեռնել եվրոպական եւ ԵՏՄ շուկաների ուսումնասիրման նոր ռազմավարություն մշակելու աշխատանքները: «Մենք շատ ենք կարեւորում ԱՄՆ Միջազգային զարգացման գործակալության կողմից Հայաստանում իրականացվող ծրարգրերը, քանի որ դրանք մեծապես նպաստում են մեր երկրում գյուղատնտեսության ոլորտի զարգացմանը», - նշել է նախարար Սերգո Կարապետյանը:
Տիկին Հիլիարդն իր հերթին վստահություն է հայտնել, որ միջազգային, այդ թվում, եւ ամերիկյան կողմի ծրագրերը, նպաստում են Հայաստանի ագրարային ոլորտի զարգացմանը, ֆերմերների եկամուտների ավելացմանը եւ համայնքների բարեկեցության բարձրացմանը:
Հանդիպման ավարտին զրուցակիցները վերահաստատել են պատրաստակամությունը ընդլայնելու երկկողմ համագործակցությունն ու փոխգործակցությունը: