ՀՀ քննչական կոմիտեի Երեւան քաղաքի Աջափնյակ եւ Դավթաշեն վարչական շրջանների քննչական բաժնում ավարտվել է բնակարանի մաքրման աշխատանքներն իրականացնող կնոջ կողմից 24.500 ԱՄՆ դոլար եւ ոսկեղեն գողանալու դեպքի առթիվ հարուցված քրեական գործի նախաքննությունը:
ՀՀ Քննչական կոմիտեից հայտնում են, որ նախաքննությամբ ձեռք բերված ապացույցներով պարզվել է, որ 29-ամյա կինը 2015 թվականի հունվարի 11-ին՝ ժամը 10:00-ից մինչեւ 17:00-ն ընկած ժամանակահատվածում, այլ քաղաքացու բնակարանը մաքրելիս ննջասենյակի զգեստապահարանում դրված պայուսակից հափշտակել է 24.500 ԱՄՆ դոլար, իսկ զարդատուփից` ոսկեղեն՝ այդպիսով տանտիրուհուն պատճառելով առանձնապես խոշոր չափի գույքային վնաս:
Մինչդատական վարույթի ընթացքում ձեռք բերված ապացույցների հիման վրա՝ կնոջը մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1-ին կետով: Նրա նկատմամբ խափանման միջոց է կիրառվել գրավը:
Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին, մեղադրական եզրակացությունը հաստատվել է, եւ գործն ուղարկվել է Երեւան քաղաքի Աջափնյակ եւ Դավթաշեն վարչական շրջանների ընդհանուր իրավասության դատարան: