Երեւանի կենտրոնում՝ Կառավարության երրորդ մասնաշենքի հարակից այգում այսօր` ապրիլի 20-ին, բացվեց «Մշակութային եղեռն-խաչքարերի խորհուրդը» բացօթյա ցուցահանդեսը, որը կգործի մինչև հոկտեմբեր: Ցուցահանդեսին ներկայացված են Արեւմտյան Հայաստանում եւ Ջուղայում ոչնչացված խաչքարերի կրկնօրինակները։ (ֆոտոռեպորտաժ)
Ժամանակակից խաչքարագործ Արտակ Համբարձումյանը, որը կրկնօրինակել է ոչնչացված խաչքարերը, լրագրողների հետ զրույցում նշեց, որ «Մշակութային եղեռն-խաչքարերի խորհուրդը» բացօթյա ցուցահանդեսին ներկայացված են Հին Ջուղայի և Արևմտյան Հայաստանի կորուսյալ 170.000 խաչքարերից միայն 13-ի կրկնօրինակները.
«Ադրբեջանի և Թուրքիայի կողմից հիմնովին ոչնչացվեցին մեր խաչքարերը, մենք փորձել ենք նկարների միջոցով վերականգնել այդ խաչքարերի կրկնօրինակները, ցավոք, մեծ թվով խաչքարերից կրկնօրինակել ենք միայն 13-ը»,-ասաց նա:
Ցուցահանդեսի լուսանկարներով ներկայացված են հայկական վանքերն ու բերդերը՝ դրանց նախկին և ներկա տեսքը պատկերող լուսանկարներով եւ տեղեկություններով։ Լուսանկարները տրամադրել է հուշարձանագետ, պատմաբան Սամվել Կարապետյանը, իսկ խաչքարերի բնօրինակների լուսանկարները՝ հայագետ-նախիջևանագետ Արգամ Ավազյանը:
«Մշակութային եղեռն-խաչքարերի խորհուրդը» բացօթյա ցուցահանդեսի բացմանը ներկա էին նաև Երևանի քաղաքապետ Տարոն Մարգարյանը, Հայաստանում Ռուսաստանի Դաշնության արտակագ և լիազոր դեսպան Իվան Վոլինկինը, ճարտարապետներ, քաղաքական գործիչներ և այլք:
Նշենք, որ 1915թ. Արևմտյան Հայաստնում հայ բնակչության զանգվածային կոտորածներին ու տեղահանությանը զուգահեռ թուրքական կառավարությունը կանխամտածված և ծրագրավորված ոչնչացրել է հայկական եկեղեցիներ, վանքեր, միջնադարյան հազարավոր ձեռագիր մատյաններ, խաչքարեր և զարդարվեստի բացառիկ նմուշներ: