Ես նորմալ կյանքով եմ ապրում, լավատես եմ, ոչ մի բանի համար չեմ մտահոգվում: «Պոզներ» հաղորդման ժամանակ պատասխանելով իր երկարակեցության գաղտնիքի մասին հարցին՝ հայտարարել է ֆրանսիահայ աշխարհահռչակ շանսոնյե Շառլ Ազնավուրը:
«Չգիտեմ, արդյո՞ք հավատում եմ Աստծուն, բայց կարծում եմ, որ նա, ում մենք Աստված ենք կոչում, կարող է մեզ տալ անհրաժեշտ ամեն ինչ»,- նշել է շանսոնյեն:
Նա խոստովանել է, որ դիետա չի պահում. «Պետք չէ աղ ուտել, պետք չէ շաքարավազ օգտագործել, պետք չէ յուղոտ բաներ ուտել… Ես ամեն ինչ ուտում եմ»: Երգիչը նա հայտարարել է, որ սպորտով չի զբաղվում, բայց փորձում է մեջքը միշտ ուղիղ պահել:
Շառլ Ազնավուրը նաեւ պատմել է, որ ապրիլի 24-ին անպայման Երեւանում է լինելու՝ մասնակցելու Հայոց ցեղասպանության 100-րդ տարելիցի միջոցառումներին: «Չի կարելի է անտեսել այն ամենը, ինչ տեղի է ունեցել: Թուրքերին պետք է ասել, որ ճշմարտությունն ասելու ժամանակն է»,- հայտարարել է նա:
Երգչի կարծիքով, թուրքերը հրաժարվում են Հայոց ցեղասպանություն ճանաչել երկու պատճառով. «Նրանք չեն կարող ճանաչել այդ փաստը, քանի որ նրանց մոտ գլխավոր բառը պատիվն է, եւ դա կարելի է հասկանալ: Բայց նաեւ մեկ այլ պատճառ կա. մարդիկ շատ հարստացան այն ամենի հաշվին, ինչը հայերին էր պատկանում»:
Ամեն դեպքում, Ազնավուրը թուրքերի հանդեպ ատելություն չի զգում, եւ դա նրան սովորեցրել է ցեղասպանության ժամանակ ամբողջ ընտանիքին կորցրած մայրը. «Մայրս թուրքերի հանդեպ ատելություն չուներ, նա միշտ ասում էր, որ թուրքերի մեջ էլ լավ մարդիկ կան»:
Երգիչը բարձր է գնահատել Հռոմի Ֆրանցիսկոս Պապի հայտարարությունն այն մասին, որ Հայոց ցեղասպանությունը 20-րդ դարում մարդկության դեմ իրականացված ամենասարսափելի հանցագործություններից է: «Հռոմի Պապն այն եզակի մարդկանցից է, որն առանց որեւէ բանից վախենալու ճշմարտությունն է ասում»,- հայտարարել է Շառլ Ազնավուրը:
