Լոռու մարզում շրջված զինվորական բեռնատարով զինծառայողներից Մարտիրոս Քոչարյանի մոտ առկա է դրական դինամիկա: Այս մասին NEWS.am-ի թղթակցի հետ զրույցում ասաց Կենտրոնական կլինիկական զինվորական հոսպիտալի պետ Արամ Ասատուրյանը:
Նա նշեց, որ զինծառայողի վիճակը դեռ գնահատվում է ծանր, նա գտնվում է Վերակենդանացման բաժանմունքում, բայց դրական դինամիկան նկատելի է: Մարտիրոս Քոչարյանին ամիսներ անց նորից պետք է վիրահատեն, ավելի վաղ զինծառայողի մոտ վերականգնվել էին կոնքի կոտրվածքը, միզապարկի, ուղիղ աղիքի ամբողջականությունը:
Ցավոք, ոչ մի դրական փոփոխություն չկա վթարի հետեւանքով վիրավորված եւ Վերակենդանացման բաժանմունքում գտնվող մյուս զինծառայողի՝ Մհերի մոտ: Արամ Ասատուրյանը նշեց, որ բաժանմունքներում գտնվող զինծառայողների վիճակը լավ է, մյուս շաբաթ դուրս կգրեն:
Հիշեցնենք, որ ապրիլի 17-ին, ժամը 17.00-ի սահմաններում, ժամկետային զինծառայողներին տեղափոխող N զորամասին պատկանող «Ուրալ» մակնիշի ավտոմեքենան Սպիտակ-Երեւան ավտոճանապարհի 19-րդ կիլոմետրին դուրս է եկել երթեւեկելի հատվածից եւ շրջվել հարակից ձորակը: Ավտոմեքենայի թափքում գտնվող զինծառայողները տարբեր աստիճանի մարմնական վնասվածքներով տեղափոխվել են Սպիտակ քաղաքի հիվանդանոց:
ՊՆ մամուլի ծառայությունից հայտնում են, թե երեք վիրավոր զինծառայող Սպիտակի հիվանդանոցում ստանալով առաջին բուժօգնություն` տեղափոխվել են Կենտրոնական կլինիկական զինվորական հոսպիտալ: Դեպքի մանրամասները ճշտվում են, հարուցվել է քրեական գործ:
Վթարի հետեւանքով ստացած վնասվածքներից մահացել է ժամկետային զինծառայող Արտյոմ Գերասի Թորոսյանը (ծնված 1995թ., Սիսիանի զ/կ, 2013թ. 2-րդ զորակոչ): Վանաձորում ծառայող զինվորները գնացել էին Արմավիրի մարզի ուսումնական կենտրոն զորավարժությունների, զորամաս վերադառնալու ճանապարհին էլ եղավ դեպքը: Բեռնատարը շրջվել է Սպիտակի ոլորանների վրա եւ ընկել ձորը, մահացող զինծառայողը, ով պետք է զորացրվեր աշնանը, հենց վարորդն է: Վթարի հետեւանքով վիրավորվել էր 9 զինծառայող, նրանց բոլորին գիշերը Սպիտակի հիվանդանոցից տեղափոխել են Երեւան՝ Կենտրոնական կայազորային հոսպիտալ:
