Հայոց ցեղասպանության թանգարանում, որի նոր մշտական ցուցադրության պաշտոնական բացման արարողությունը տեղի ունեցավ այսօր՝ ապրիլի 21-ին, մշտական ցուցադրության են դրվել բնօրինակ թերթեր, գրքեր, որոնցից շատերի երկրորդ օրինակը հնարավոր չէ գտնել: Ցեղասպանության ինստիտուտ-թանգարանի տնօրեն Հայկ Դեմոյանի խոսքով՝ վերջին մի քանի տարվա ընթացքում Ցեղասպանության վերաբերյալ այնքան նյութ է հավաքվել, որ բավարար է եւս մի քանի նման թանգարան բացելու համար:
«Եթե իմ առջեւ առաջադրանք դրվի 5 տարբեր լուծումներով Հայոց ցեղասպանության թանգարան բացել, ես դա պատրաստ եմ անել: Այսինքն այդքան քանակով նյութ է հավաքվել»,- լրագրողներին ասաց Հայկ Դեմոյանը:
Թանգարանի ցուցադրության սրահը սկսվում է ներածական, Օսմանյան կայսրությունում ապրող հայերի մասին պատմող տեսանյութով:
Թանգարանի ցուցասրահում պաստառի վրա խորագրերով ներկայացված են Ցեղասպանության, Արեւմտյան Հայաստանում ապրող հայրերի մասին պատմող լուսանկարներ, պատմություններ: Հայկ Դեմոյանի խոսքով՝ պաստառը խորհրդանշում է հայ ժողովրդի անցած ճանապարհը՝ խորդուբորդերով, անկումներով:
Պաստառն ավարտվում է Ցեղասպանությանը զոհ գնացած հայ մտավորականների լուսանկարներով, որոնք նայում են այն պատին, որի վրա փակցված են Մեծ եղեռնի կազմակերպիչների լուսանկարները:
Թանգարանում ներկայացված է նաեւ 1915թ. բռնագաղթված հայերի լքյալ գույքի բռնագրավման վերաբերյալ երիտթուքերի կառավարության ընդունած օրենքը՝ բնօրինակով:
Թանգարանում նախկին երեքի փոխարեն այժմ 12 սրահ կա: Ներկայացված են մի քանի տասնյակ խորագրեր:
Թանգարանում ցուցադրվում են լուսանկարները, որ արվել են գաղթի ճանապարհին ռուս եւ հայ զինվորականների կողմից:
Թանգարանում առանձին սենյակ կա, որտեղ կարելի է լսել ականատեսների պատմությունը:
Թանգարանի շինարարության համար 4.5 միլիոն դոլար գումար է ծախսվել: Գումարը տրամադրել են բարերարներ Գաբրիել Ջեմբերջյանը, Ռալֆ Յիրիկյանը: