Եվրախորհրդարանը ո՛չ պատմության ինստիտուտ է, ո՛չ դատարան, սակայն կառույցի բարոյական պարտքն է՝ տեսակետ հայտնել այնպիսի կարեւոր տարեթվերի շուրջ, ինչպիսին է Հայոց ցեղասպանության 100-րդ տարելիցը: Այս մասին NEWS.am-ի թղթակցի հետ զրույցում հայտարարեց Եվրախորհրդարանի չեխ պատգամավոր Միքայելա Սոյդրովան:
Նա նաեւ նշեց, որ կողմ է քվեարկել Հայոց ցեղասպանության բանաձեւին: «Ես ողջունում եմ Եվրախորհրդարանի՝ Հայոց ցեղասպանությունը պաշտոնապես ճանաչելու կոչը: Միաժամանակ, Եվրախորհրդարանը երկու կողմերին էլ՝ Հայաստանին եւ Թուրքիային, խրախուսում է երկկողմ հաշտեցման համար ուղիներ գտնելու հարցում»,- ասաց Միքայելա Սոյդրովան:
Հիշեցնենք, որ ապրիլի 15-ին Եվրախորհրդարանը ձայների մեծամասնությամբ Հայոց ցեղասպանության մասին բանաձեւ ընդունեց, որում Թուրքիային կոչ է արվում 1915 թվականի իրադարձությունները որպես ցեղասպանություն ճանաչել, առերեսվել անցյալի հետ եւ շարունակել ջանքեր գործադրել՝ հայ եւ թուրք ժողովուրդների իրական հաշտեցման ուղղությամբ: