ԱՄՆ կոնգրեսական Ադամ Շիֆը հիասթափված է նախագահ Բարաք Օբամայի կողմից Հայոց ցեղասպանության զոհերի հիշատակի իր ելույթում ցեղասպանություն բառը չարտասանելու հանգամանքից։

«Ես խորապես հիասթափված եմ, որ նախագահը հերթական անգամ 1915-1923թթ. 1.5 մլն հայերի բնաջնջումը չի կարող ճիշտ նկարագրել հենց այն բառով, որը իրականում եղել է, այն է՝ ցեղասպանություն։ Որքա՞ն պետք է սպասեն զոհերն ու նրանց ընտանիքները, մինչեւ մեր երկիրը համարձակություն կգտնի Թուրքիային հակազդելու համար, որպեսզի նա ընդունի Օսմանյան կայսրության տարածքում անցյալում կատարած սպանությունների մասին ողջ ճշմարտությունը։ Եթե որ 100 տարի հետո, ապա ե՞րբ»,- հայտարարել է Շիֆը։

Նրա խոսքով՝ ԱՄՆ-ն արդեն վաղուց հպարտանում է, որ մարդու իրավունքների պաշտպանության եւ վայրագությունների դեմ պայքարի կենտրոն է։ «Անցյալ շաբաթ Հռոմի Պապը հզոր ելույթ ունեցավ արյունաքամ վերքը վիրակապելու մասին, որը արնահոսում է ժխտման դեպքում։ Ես կցանկանայի, որ Վաշինգտոնը դա լսեր» ,- հայտարարեց նա։