Մենք ժամանել ենք Հայաստան, որ հարգենք Հայոց ցեղասպանության զոհերի հիշատակը։ Այդ մասին NEWS.am-ի թղթակցի հետ զրույցում ասել է Ռուսաստանի Դաշնության խորհրդի փոխնախագահ Գալինա Կարելովան։
«Մենք բոլորս պետք է սերտենք պատմության դասերը։ Ցեղասպանության ճանաչման եւ գնահատման հարցում Ռուսաստանը երբեք չի փոխել իր դրքորոշումը։ Պատմության դասերն անհրաժեշտ է իմանալ եւ հիշել, որ ոչ նացիզմը, ոչ ֆաշիզմը, ոչ այլատյացությունը տեղ չունենան։ Մենք՝ խորհրդարանականներս պետք է ամեն ինչ անենք, որ երկրների ու ժողովուրդների միջեւ միայն համագործակցություն, խաղաղություն եւ փոխվստահություն լինի»,- ասել է Կարելովան։ Նրա խոսքով, այսօր կարեւոր է ստեղծարար գործունեությունը, կառուցողական համագործակցությունն ու երկխոսությունը։
Խոսելով հայ-ռուսական հարաբերություններից՝ Գալինա Կարելովան դրանք բնորոշել է որպես բարիդրացիական եւ բարեկամական ամենաբարձր մակարդակով։
