Ավստրիայի եւ Գերմանիայի կողմից Հայոց Ցեղասպանության ճանաչումը շատ կարեւոր է, նրանք Առաջին համաշխարհային պատերազմի ժամանակ եղել են Թուրքիայի դաշնակիցը եւ գիտեն, թե ինչ է եղել: Այս մասին NEWS.am-ի թղթակցի հետ զրույցում ասաց «Ժառանգության» վարչության փոխնախագահ Արմեն Մարտիրոսյանը:

Նա նշեց, որ տեղեկություն կա նաեւ, որ հնարավոր է Գերմանիայի կանցլեր Անգելա Մերկելը եւս Ցեղասպանությունը ճանաչի: «Քաղաքական շահերը միշտ կան, բայց դրանից բացի՝ կան նաեւ համամարդակային արժեքներ: Վերջին ժամանակահատվածում այն, ինչ տեղի է ունենում, համամարդկային արժեքների գերակայության շրջանակում է, բայց քաղաքական շահերը այսօր էլ ստիպում են, որպեսզի ցեղասպանություն բառը չօգտագործեն: Ինչպես ասում են՝ ճշմարտությունը չի մեռնում, ընդամենը հիվանդանում է, այժմ ճշմարտության առողջացման փուլն է սկսվել, կան համամարդկային արժեքներ, որի շրջանակներում լինում է  ճանաչման գործընթաց եւ ինչ-որ մի պահի համամարդկային արժեքները գերակա կդառնան»,-ասաց Արմեն Մարտիրոսյանը:

Նա շեշտեց, որ եվրոպական պետություններում համամարդկային արժեքները խորը նստվածք ունեն, եւ ինչ-որ պահի դրանք իրենց արտահայտությունը պետք է ունենան:

Նշենք, որ ապրիլի 22-ին Ավստրիայի խորհրդարանի 68-րդ լիագումար նիստը մեկնարկել է Հայոց ցեղասպանության զոհերի հիշատակին հարգանքի տուրք մատուցելով։  Նիստին ներկա պատգամավորները 1 րոպե լռությամբ հոտնկայս հարգել են անմեղ զոհերի հիշատակը։ Դրանից հետո Ավստրիայի խորհրդարանի 6 խորհրդարանական ուժերը համատեղ հայտարարությամբ ընդունել եւ ճանաչել են Հայոց ցեղասպանությունը։