Գերմանիան ի վերջո պետք է ընդունի Հայոց ցեղասպանությունը, 1915թ. ջարդերի համար պետք է օգտագործի ցեղասպանություն եզրը։ NEWS.am-ի հետ զրույցում նման կարծիք է հայտնել Բոխումի գերմանական համալսարանին կից Սփյուռքի եւ Ցեղասպանության ինստիտուտի հիմնադիր տնօրեն Միհրան Դաբաղը։
«Գերմանիան միշտ էլ զգույշ է եղել այդ հարցում, եղել է Թուրքիայի կողքին։ Այս հարցում Գերմանիայի մոտեցումները այսօր շատ քիչ են տարբերվում 1915թ. մոտեցումներից։ Նրանք այն ժամանակ գիտեին ամեն ինչի մասին, բայց լռում էին։ Հիմա էլ կարող են իմանալ եւ լռել»,- ասաց նա՝ հավելելով. «Հիմա չեն լռում, բայց շատ անձայն են»։
Այսուհանդերձ, Միհրան Դաբաղի խոսքով՝ այսօր կան որոշակի հաջողություններ, եւ դրանում իր որոշակի դերն է խաղացել իր ղեկավարած ինստիտուտը, որի նախաձեռնությամբ Գերմանիայում հայտնի 150 գիտնականներ Բունդեսթագին ուղղված նամակ են գրել՝ պահանջելով ճանաչել Հայոց ցեղասպանությունը։
«Թուրքիան եւ Արեւմուտքը ուզում են տիրել մեր պատմությանը եւ հղկել այն այնպես, որ միջքաղաքական հարցերում այլեւս փուշ չմնա։ Եւ այնպիսի ձեւակերպում գտնել, որը ընդունելի կլինի թուրքական կողմի համար»,- ասաց Դաբաղը։